अमृत बास्कुने
युवाहरुको नेतृत्व र क्षमता विकासमा अग्रणी भूमिका खेल्दै आएको म्याग्दी जेसीजेल आफ्नो २६ औं पदस्थापन तथा पुरस्कार वितरण गरेको छ ।
म्याग्दी जेसीजको २६ औं पदस्थापन तथा पुरस्कार वितरण कार्यक्रम गण्डकी प्रदेशसभा सदस्य हरिबहादुर भण्डारीको प्रमुख आतिथ्यतामा सम्पन्न भएको थियो ।
म्याग्दी जेसीज वर्ष २०२४ का शाखा अध्यक्ष दिनेश बानियाँको अध्यक्षतामा शुरु भएको कार्याक्रमको अन्तिम सत्रको अध्यक्षता जेसीजको वर्ष २०२५ का शाखा अध्यक्ष विनोद घर्तीले गर्नुभएको थियो । जेसीजको वर्ष २०२४ का महासचिव सज्जन श्रेष्ठ तथा वर्ष २०२५ का महासचिव देवेन्द्र घिमिरेले सञ्चालन गर्नुभएको कार्यक्रममा उपाध्यक्षहरु गणेश सुवेदी, कपिल बानियाँ, प्रतिष श्रेष्ठ, सूर्य गौतम, कार्यकारीणी उपाध्यक्षहरु सुनिता श्रेष्ठ, डेकमायाँ केसी लगायतको सहभागिता रहेको थियो ।
जेसीसका वर्ष २०२५ का शाखा अध्यक्षले थिम डाईरेक्टरमा विशाल खत्री, तालिम संयोजक सचिना सापकोटा, सहकोषाध्यक्षमा तेजेन्द्रबहादुर खत्री, सहसचिवमा गोकुल सुनार, शाखा सम्पादक कृष्णप्रसाद पौडेल, कोषाध्यक्ष नविन पौडेल, महासचिवमा देबेन्द्र बहादुर घिमिरे, कानुनी सल्लाहकारमा सुमन बानियाँ र वरिष्ठ कार्यकारिणी उपाध्यक्षमा सज्जन श्रेष्ठलाई मनोनित गर्नुभएको छ ।
कार्यक्रममा म्याग्दी जेसीजका संस्थापक अध्यक्ष सिनेटर रमेशकुमार श्रेष्ठ, नेपाल जेसीजका पूर्व राष्ट्रिय अध्यक्ष सिनेटर धनञ्जयकुमार श्रेष्ठ, नेपाल जेसीज वर्ष २०२५ का राष्ट्रिय उपाध्यक्ष तथा म्याग्दी जेसीज वर्ष २०२२ का शाखा अध्यक्ष सन्दिप खत्री, निरुपित राष्ट्रिय उपाध्यक्ष अभिषेक दुलाल लगायतको सहभागिता रहेको थियो ।
सन १९९९ मा रमेश कुमार श्रेष्ठको अध्यक्षतामा स्थापना भएको जेसीजले म्याग्दी जिल्लामा जुनियर लेभलको फुटबल प्रतियोगिता नियमित रुपमा सञ्चालन गर्दै आएको छ । वर्ष २०२४ मा भएको जेसीज कपबाट आगामी पाँच वर्षका लागि एभरेष्ट ग्लोबल भिजा सर्भिस सँग मुख्य प्रायोजक सम्झौता गरेर फुटबल प्रतियोगितालाई दिगो बनाउने कार्यमा अगाडी बढ्नका लागि निकै महत्वपूर्ण भूमिका वर्ष २०२४ का अध्यक्ष दिनेश बानियाँले खेल्नु भएको वर्ष २०२५ का महासचिव देवेन्द्र घिमिरेले बताउनुभयो । जेसीजले युवाहरुमा नेतृत्व क्षमता विकासका लागि महत्वपूर्ण भूमिका खेल्ने भएकोले पनि जेसीज युवाहरुको ढुकढुकी हुनु पर्ने उहाँको भनाई थियो । म्याग्दीमा खेलकुद क्षेत्रमा पनि जेसीजले थालेको यात्रा कोभिड–१९ गर्दा बिचमा केही समय रोकीएको भए पनि २२ औं संस्करण सम्म सफलता पूर्वक सफल हुनु जेसीजको सकारात्मक पाटो भएको उहाँको भनाई थियो ।
जेसीजका नवनिर्वाचित अध्यक्ष बिनोद घर्तीले जेसीजको महत्व र आस्थामा कुनै पनि आँच नआउने तबरले एक वर्ष काम गर्ने बताउनु भयो । हरेक वर्ष परिवर्तन हुने जेसीजको नेतृत्वले सहज र सफल नेतृत्व गर्नका लागि सबैलाई प्रेरित गर्ने उहाँको भनाई थियो । पूर्व अध्यक्ष र पूर्व सदस्यहरुले निर्माण गरेको इतिहास र इज्जतमा कुने पनि प्रकारको दाग नलाग्ने गरी अहिलेको नेतृत्वले काम गर्ने नवनिर्वाचित अध्यक्षको भनाई थियो ।
