अमृत बास्कुने
म्याग्दीको पवित्र तिर्थस्थल गलेश्वरधाम सम्म पुग्ने बेनी–गलेश्वर सडक किनारमा लगाइएका बिरुवामा गलेश्वरका युवाले पानी हाल्न थालेका छन् । वर्षा सकिएर हिउँद शुरु भए पछि सुख्खा यामले गर्दा बिरुवा सुक्ने खतरा बढ्न थालेको अवस्थामा युवाहरुले पानी ओसारेर बिरुवामा हालेका हुन् ।
गलेश्वरमा रहेको होटल याक बेनी प्रालिका बासुदेव सुवेदी र हरि कँडेलले आइतबार बिहान देखि बिरुवामा पानी हाल्न थाल्नु भएको हो । बेनी गलेश्वर सडक किनारमा हरियाली बनाउने उद्देश्य सहि तगत वर्ष म्याग्दी कोरला यातायात प्रालिका चालक काठमाडौंका रुद्र अधिकारीले झण्डै एक लाख रुपियाँको लागतमा तीन सय बिरुवा लगाउनु भएको थियो । करिब एक लाख रुपियाँ लागतमा बिरुवा ल्याए पछि बेनी नगरपालिकाका नगर प्रमुख सुरत केसी लगायतको अगुवाइमा बिरुवा रोप्ने काम भएको थियो ।
अधिकांश कार्यक्रमहरुमा बृक्षा रोपण गर्ने गरिए पनि त्यसको गोडमेल तथा सिंचाइ तथा संरक्षण गर्ने तर्फ कसैले पनि ध्यान नदिने परम्परा जस्तै बन्ने गरेको अवस्थामा गलेश्वरका युवाहरुले बोलेरो गाडीमा ट्याङ्कीमा पानी ल्याएर सिंचाइ गरेर सकारात्मक कार्यको थालनी गर्नुभएको छ । बिष्णु रिजालले पानी बोक्नलाई गाडी उपलब्ध गराएको र पानीको व्यवस्था गरेर आफूहरुले विरुवामा सिंचाइ गरेको बासुदेव सुवेदीले बताउनुभयो ।
