चाडपर्वमा सुरक्षाको लागि विशेष पहल गर्ने

अमृत बास्कुने
जिल्ला विपद् व्यवस्थापन समिति मुस्ताङले चाडपर्वको समयमा यात्रुहरुको सुरक्षा जोखिमलाई ध्यानमा राखी सडक दुर्घटना हुन नदिने उपाय अवलम्बन गर्ने तथा यात्रुहरुको जीउधनमा सुरक्षाको विशेष सर्तकता अपनाउने भएको छ ।
जिल्ला विपद् व्यवस्थापन समिति मुस्ताङका अध्यक्ष तथा प्रमुख जिल्ला अधिकारी विष्णुप्रसाद भुषालको अध्यक्षतामा मंगलबार बसेको बैठकले जिल्लाको समग्र विषयवस्तुको अध्ययनका साथै समग्र जिल्लाको सुरक्षाका लागि तदारुकता देखाउने भएको हो । चाडवाडको समयमा सडक दुर्घटनालाई न्यूनिकरण गर्नुका साथै कुनै पनि प्रकारको विपद् तथा दुर्घटना भएमा तत्काल उद्धारका लागि सबै चुस्त अवस्थामा रहने निर्णय भएको छ । गर्मी तथा वर्षात्को समय सकिए सँगै जाडो र हिमपातको अवस्था सुरु हुने भएकाले पनि त्यसको पूर्वतयारीका लागि बैठक बसेर निर्णय गरेको हो ।
विपद् पूर्व तयारी तथा प्रतिकार्य योजना बमोजिम गाउँपालिका स्तरमा मनसुनजन्य विपद्को अवस्थामा आवश्यक पर्ने विपद् उद्दार र राहत सामग्रीहरू आवश्यकताका आधारमा सबै पालिकाहरुले खोजेको बखत तत्काल उपलब्ध हुने गरी भन्डारण गरिने भएको छ । वर्तमान समयमा डेंगुको प्रभाव मुस्ताङ जिल्लामा पनि भित्रिएको सन्दर्भमा यसबाट थप, प्रकोप फैलन नदिन जनचेतनामूलक कार्यक्रम र प्रकोपबाट बच्नको लागि पर्याप्त औषधी सहितको उपचारको व्यवस्था गर्न जिल्ला जनस्वास्थ्य कार्यालय, मुस्ताङ जिल्ला अस्पताल र स्थानीय तहलाई अनुरोध गरिएको जिल्ला विपद् व्यवस्थापन समितिका सदस्य तीलक बिकले जानकारी दिनुभयो ।
जिल्ला भित्र विपद्बाट पर्न सक्ने प्रभाव र क्षतिको न्यूनीकरणका लागि सबै सुरक्षा निकायहरुलाई आवश्यक स्रोत साधन सहित क्वीक रेस्क्यु टिम र ¥यापिट रेस्क्यु टिम तयारी अवस्थामा राख्नका लागि अनुरोध गरिएको जनाइएको छ ।
जिल्ला भित्र जुनसुकै अवस्थामा आउन सक्ने विपद्बाट बच्नको लागि विपद् पूर्व, विपद्को समय, र विपद् पश्चात देखापर्ने सम्पूर्ण प्रभावको न्यूनीकरण गर्न सूचना संप्रेषण प्रक्रियामा सम्बधित सरोकारवालाहरु उच्च सतर्कतामा रहने तथा समन्वय र सहकार्य गर्नका लागि समग्र जिल्ला तयार रहेको प्रमुख जिल्ला अधिकारी भुषालले बताउनुभयो ।
विपद्को अवस्थामा बाटो अवरुद्ध हुन नदिनका लागि आयोजना अन्तर्गतका ठेकेदार कम्पनीका ठुला मेशिनरी साधनहरू अद्यावधिक लगत राखि तत्काल परिचालन गर्न सक्ने गरी कालिगण्डकी कोरिडोर सडक आयोजना, पूर्वाधार कार्यालय मुस्ताङ र अन्य स्थानीय तहले तयारी अवस्थामा राख्ने प्रतिबद्धता जनाएका छन् ।
विपद्को अवस्थामा मानवीय क्षति न्यूनीकरण गर्नका लागि स्वास्थ्य निकायहरू र जिल्ला अस्पतालमा पर्याप्त उपचार जनशक्ति एवं औषधीसहितको प्रबन्ध गर्ने साथै जिल्ला भित्र उपलब्ध रहेका सबै एम्बुलेन्सहरू तयारी अवस्थामा राख्ने व्यवस्था सम्बन्धित गाउँपालिका र निकायलाई अनुरोध गरीएको छ ।
जुनसुकै प्रकारको विपद् सामना गर्न सक्ने गरी स्थानीय तहले पालिकास्तर र वडास्तरमा पूर्व तयारी स्वरुप जनशक्ति, साधन स्रोत, स्यंमसेवक लगायतको व्यवस्थापनमा ध्यान दिने, हिमाली क्षेत्रमा हुने लेक लाग्ने समस्याका विरामीहरुका लागि आकस्मिक उद्धार र उपाचारको लागि पर्याप्त जनशक्ति र साधन स्रोतसहित सजक अवस्थामा रहन स्थानीय तह, सुरक्षा निकायहरु र जिल्ला अस्पताललाई तयारी अवस्थामा रहन आग्रह गरिएको छ ।
विपद् पूर्व तयारी तथा प्रतिकार्य योजना बमोजिम विपद्को व्यवस्थापनलाई मोबाइल एप सुदृद्ध बनाई जनधनको क्षति कम गर्न जनशक्तिको क्षमता विकास गर्न विभिन्न सरोकारवाला निकायको समन्वयमा सुरक्षा निकायहरुबाट अभ्यास सञ्चालन गर्ने निर्णय भएको प्रमुख जिल्ला अधिकारी भुषालले बताउनुभयो ।
विपद् व्यवस्थापनको बैठकमा जिल्ला समन्वय समितिका उपप्रमुख आइतेलाल थकाली तथा स्थानीय तहका प्रमुख एवम् प्रतिनिधिका साथै सरोकारवाला निकायको उपस्थिति रहेको थियो । जिल्ला सुरक्षा समिति एवम् अन्य सरोकार वालाले पनि विपद् प्रतिकार्यमा प्रतिबद्धता जनाएका थिए ।