नेत्रहीन क्रिकेटरको विश्वकप सपनामा बाधक बन्दै सरकार

काठमाडौँ, २२ मंसिर – पुल्चोकस्थित इन्जिनियरिङ कलेज क्रिकेट मैदानको ‘आउटफिल्ड’ मा भर्खरै काटेको घाँसका ठुटाले हिँड्नसमेत मुस्किल छ । नियमित मर्मत र रेखदेख अभाव भोगेको पिचको अवस्था नाजुक छ । यस्तो पिचमा नेत्रहीन क्रिकेटर विश्वकपको सपना बुन्दैछन् ।
जनवरी २८ देखि फ्रेब्रुअरी १२ तारिखसम्म भारतमा हुने नेत्रहीन टीट्वेन्टी विश्वकप क्रिकेटका लागि टिम बनाउन मंगलबा।रदेखि छनोट खेल सुरु भएको छ । छनोट खेलमा विभिन्न १६ जिल्लाबाट आएका ३४ नेत्रहीन क्रिकेटर चौका र छक्का प्रहार गरिरहेका छन् । विश्वकपका लागि अन्तिम १४ खेलाडी छनोट गर्ने नेपाल नेत्रहीन क्रिकेट संघको योजना छ ।
छनोट प्रतियोगिताकै लागि आर्थिक अभाव बेहोरिरहेको नेत्रहीन क्रिकेटको विश्वकप सहभागिता अझ मुस्किल छ । बृहत् सातौं राष्ट्रिय खेलकुद प्रतियोगिताको तयारीमा जुटेको सरकारले विश्वकपजस्तो महत्त्वपूर्ण प्रतियोगिताको तयारीमा रहेको नेत्रहीन क्रिकेटलाई प्राथमिकतामा राखेकै छैन । सहयोग माग्न जाँदा खेलकुदमन्त्री दलजित श्रीपाइलीले दिएको जबाफले दुःखी बनेका छन्, नेत्रहीन क्रिकेट संघका अध्यक्ष पवन घिमिरे ।
‘विश्वकप तयारीका लागि आर्थिक सहयोग जुटाउन हामी धेरै ठाउँमा पुग्यौं । खेलकुद मन्त्रालय र मन्त्रीज्यूसँग पनि कुरा गर्‌यौं’, अध्यक्ष घिमिरे भन्छन्, ‘तर मन्त्रीज्यूले अहिले विश्वकप छाड्दिनुस्, सातौं खेलकुद सम्पन्न गर्न सहयोग गर्नुस् भन्ने जबाफ दिनुभयो ।’ मन्त्रीको जबाफबाट अवाक् बनेर फर्किएका अध्यक्ष घिमिरे मंगलबार पुल्चोक क्रिकेट मैदानमा पनि दुःखेसो पोख्दै थिए ।
‘हामीले पनि विश्वकपमा नेपालकै नाम राख्न प्रतिस्पर्धा गर्ने हो । नेपालकै झन्डा फहराउने हो’, उनी भन्छन्, ‘तर सबलांग खेलकुदमा पराजित भएरै आउँदासमेत सम्मान गर्ने सरकारले नेत्रहीन क्रिकेट विश्वकप खेल्न जाँदासमेत वास्ता गर्दैन ।’
फरक क्षमता भएकाहरूको खेलकुद प्रतियोगितामध्ये सबैभन्दा सक्रिय छ, नेत्रहीन क्रिकेट । नेत्रहीन क्रिकेटरले यसअघि पनि विश्वकप खेलिसकेको छ । सन् २०१२ मा भारतमै भएको पहिलो टीट्वेन्टी विश्वकपमा नेपाली नेत्रहीन टोलीले सहभागिता जनाएको थियो । यसै वर्षको सुरुवातमा भारतको केरलामा भएको एसिया कपमा पनि नेपाली टोली सहभागी थियो ।
यसबीचमा पाकिस्तान तथा इङ्ल्यान्डको महिला टोलीसँग समेत मैत्रीपूर्ण खेल खेल्दै आएको नेत्रहीन क्रिकेट टोलीले यी सबै अवसरमा आर्थिक अभाव झेल्दै आइरहेको छ ।
खेलकुद मन्त्रालयले नेत्रहीन क्रिकेटलाई महिला र पुरुष टोलीको राष्ट्रिय प्रतियोगिता आयोजनाका लागि वार्षिक ६ लाख रुपैयाँ दिने गरेको छ । सोही रकमबाटै खर्च बचाएर नेत्रहीन क्रिकेट टोली विश्वकपलगायत अन्तर्राष्ट्रिय प्रतियोगिता खेल्न जाने गरेको छ । सरकारी सहयोग नपाउँदा राष्ट्रिय प्रतियोगितासमेत नियमित गर्न नसकिएको अध्यक्ष घिमिरे बताउँछन् । अन्न्पूर्ण