नेकपा एमाले म्याग्दीले जिल्ला अधिवेशन र पालिका अधिवेशन सम्पन्न गरे सँगै वडा अधिवेशनको तयारी थालेको छ । नेकपा एमालेको पश्चिम म्याग्दीको धवलागिरी गाउँ पालिकाकमिटीले चैत २२ गते देखि वडा अधिवेशन गर्ने भएको छ ।
नेकपा एमाले धवलागिरी गाउँ कमिटीका अध्यक्ष प्रगति कार्कीका अनुसार २२ गते लुलाङ, २३ गते मुना, २४ गते मुदी, २५ गते मराङ र ३० गते ताकममा वडा अधिवेशन गर्ने निर्णय भएको हो । नव निर्वाचित गाउँ कमिटीको दोश्रो बैठकले वडा अधिवेशनको मिति तय गरेको उहाँले जानकारी दिनुभयो ।
गाउँपालिकाको बैठकलाई सम्बोधन गर्दै नेकपा एमाले म्याग्दीका पूर्व अध्यक्ष एवम् नेकपा एमाले गण्डकी प्रदेश कमिटी सदस्य हरिकृष्ण श्रेष्ठले हरेक संगठनलाई चलायमान बनाउनका लागि निश्चित तोकिएको समयमा अधिवेशनबाट नयाँ नेतृत्व चयन हुनु पर्ने बताउनुभयो । उहाँले भन्नुभयो–एमाले जनमतमा आधारीत पार्टी हो र जनताको उपश्थितिमा उनीहरुले नै चयन गरेको प्रतिनिधिको भेलाले नयाँ कमिटी चयन गर्ने गर्दछ । एमालेले अबका सबै निर्वाचनमा ५१ प्रतिशत मत सहित जित्नु पर्ने बताउँदै उहाँले धवलागिरी गाउँपालिकामा पनि एमालेको बहुमत सहितको अवस्था सृजना गर्नका लागि सबै पंक्ति लाग्नु पर्नेमा जोड दिनुभएको थियो ।
