अमृत बास्कुने
नेकपा एमाले गण्डकी प्रदेश कमिटीका अध्यक्ष नवराज शर्माले नेपाल कम्युनिष्ट पार्टी एमाले पहिलो पार्टी मात्रै नभएर ५१ प्रतिशत मत सहितको पार्टी बनाउनु पर्ने बताउनुभएको छ ।
नेकपा एमाले जिल्ला कमिटी म्याग्दीको १० औं अधिवेशनबाट सर्वसम्मत रुपमा चयन भएको जिल्ला कमिटीको पदस्थापनमा बोल्दै उहाँले मुलुक निर्माणका लागि एमाले पहिलो शक्तिको रुपमा आउनु पर्ने र त्यसका लागि पनि ५१ प्रतिशत मत सहितको हुनु पर्ने धारणा राख्नु भएको हो ।
विगतमा भएका एमाले सरकारले पनि मुलुकको समुन्नतीका लागि प्रयास गरेको स्मरण गराउँदै भन्नुभयो–‘एमालेले नेतृत्व गरेका हरेक सरकारले जनपक्षिय काम गरेको छ त्यसैले अब मुलुकको समुन्नती साथै समृद्ध नेपाल सुखी नेपालीको चाहना पुरा गर्न पनि एमालेका लागि ठूलो मात्रै नभएर ५१ प्रतिशतकै एमाले चाहिन्छ ।’
गत निर्वाचनमा गठबन्धनका बिरुद्धमा एक्लै भिडेको एमालेले ७७ मध्ये ४० भन्दा बढी जिल्लामा समानुपातिक मतमा पहिलो भएको एमाले देशको समग्र मतमा पनि लोकप्रियताका लागि पहिलो हो तर यस्तो अवस्थाले पनि मुलुकको नेतृत्व गर्न र समुन्नतीका लागि अप्ठेरो देखियो । जब एमालेको एकल बहुमत पुग्छ तब मात्रै मुलुकको बिकास र समृद्धिले उच्च गतिमा अगाडी बढ्ने भएकोले ५१ प्रतिशत मत एमालेको पहिलो लक्ष्य हो–प्रदेश अध्यक्ष शर्माले भन्नुभयो ।
एमाले म्याग्दीको १० औं अधिवेशनबाट निर्वाचित भएका अध्यक्ष बालकृष्ण सुवेदी, उपाध्यक्ष प्रमोद श्रेष्ठ, सचिव थमसरा पुन, उपसचि खड्ग गिरी र सतप्रसाद रोकालाई पदस्थापन गरीएको थियो । निवर्तमान अध्यक्ष देवेन्द्र कटुवालले अध्यक्ष बालकृष्ण सुवेदीलाई पद हस्तान्तरण गर्दै अध्यक्षको कुर्सीमा बसाउँदै जिम्मेवारी सुम्पनु भएको थियो । त्यस्तै सचिव थमसरा पुनलाई निवर्तमान सचिव सुरत केसीले पार्टीका दस्ताबेज तथा माइन्युट हस्तान्तरण गर्नुभएको थियो ।
पदस्थापनमा बोल्दै नेकपा एमालेका केन्द्रीय सदस्य एवम् म्याग्दी इन्चार्ज गोविन्द नेपालीले एमालेको नयाँ नेतृत्वले म्याग्दीमा गएको निर्वाचनमा गुमेको साथ फर्काउने जिम्मेवारी कुशलतापूर्वक निर्वाह गर्ने अपेक्षा गर्नुभयो । उहाँले २०७० को संविधानसभा निर्वाचन र २०७४ को आम चुनावको परीणाम एमालेको पक्षमा आए पनि गठबन्धनका नाउँमा गत निर्वाचनमा कांग्रेसले जितेको म्याग्दीमा विगतमा आफ्नो जितलाई फर्काउनका लागि २०८४मा एमाले झण्डा फहराउनै पर्ने बताउनुभयो ।
नवनिर्वाचित अध्यक्ष बालकृष्ण सुवेदीले सबैको त्याग र मेहनत मिसिएर बनेको एमाले पार्टी देश निर्माण अनि देशको नेतृत्वका लागि जिल्ला मजबुत बनाउने जिम्मा आफ्नो काँधमा आएको बताउँनुभयो । उहाँले भन्नुभयो–‘म्याग्दीले दिएको जिम्मेवारी कुनै हालतमा पुरा गर्ने र अबको निर्वाचनमा एमालेलाई पहिलो पार्टी मात्रै नभएर खसेको मतको आधा भन्दा बढी एमालेको पक्षमा आउने गरी माहौल बनाउने हो ।’
निवर्तमान सचिव सुरत केसीले सञ्चालन गर्नुभएको पदस्थापन कार्यक्रममा एमाले केन्द्रीय सदस्य तथा पूर्व मन्त्री नरदेवी पुन, प्रदेश कमिटी सदस्यहरु सृजना के.सी, खरमायाँ बिटालुलगायतको उपस्थिति रहेको थियो ।
