हिउदे अधिवेसन मार्फत् बेनी नगरपालिकाले एक करोड ६० लाख बढी थप्यो बजेट

म्याग्दीको बेनी नगरपालिकाले १४ औं नगर अधिवेशनबाट एक करोड ६० लाख भन्दा बढी बजेट थप गर्दै बार्षिक बजेट संसोधन गरेको छ ।
बिहीबार भएको नगरपालिकाको १४ औं अधिवेशनले आर्थिक वर्ष २०८०÷०८१ को लागि गत असार १० गते भएको नगरसभाबाट पारित भएको बजेट संसोधन सहित पारीत गरेको नगर प्रमुख सुरत केसीले जानकारी दिनुभयो । नगरसभाले २७ वटा नयाँ योजनाहरु थप गरेको छ भने ३७ वटा योजनाहरुको बजेट संसोधन गरेको छ ।
नगरसभामा उपप्रमुख ज्योति लामिछानेले चालु आर्थिक वर्षको कुल बजेटमा चालु तर्फ २१ करोड ५० लाख ९७ हजार रुपियाँ खर्च भएको र पुजिगत तर्फ तीन करोड ५० लाख ८३ हजार तीन सय ९३ रुपियाँ खर्च भएको बताउनु भएको थियो । चालु आर्थिक वर्षको हाल सम्मको अवधिमा बेनी नगरपालिकाको कुल बजेटको चालु तर्फ ४० दशमलब ५८ र पुजिगत तर्फ १९ दशमलब ५७ प्रतिशत बजेट खर्च भएको जानकारी गराउनु भएको थियो ।
नगरपालिकाको गत असार १० गते भएको नगरसभाले चालु तर्फ ५२ करोड ९७ लाख १५ हजार र पुँजीगत तर्फ १७ करोड ९२ लाख ८५ हजार गरी कुल ७० करोड ८९ लाखको बजेट पारीत गरेको थियो । उक्त बजेटमा १४ औं नगरसभा मार्फत संसोधन गरी चालु तर्फ ५३ करोड एक लाख १५ हजार र पुजीगत तर्फ १९ करोड ४८ लाख ६५ हजार गरी कुल ७२ करोड ४९ लाख ८० हजार हुने गरी संसोधन गरेको हो ।
नगरसभाले बेनी बजार नजिकैको पर्यटकीय स्थल लभ्लीहिल जाने सडक मर्मतका लागि १५ लाख, बेनी बजारको खुल्लामञ्चका लागि १५ लाखको नयाँ योजना थपेको छ । त्यस्तै पशु बिमाका लागि पनि बजेट ब्यवस्था गरेको प्रमुख प्रशासकिय अधिकृत नेत्रप्रसाद पौडेलले जानकारी दिनुभयो । नगरपालिकाको नगरसभाबाट २७ नयाँ र ३७ वटा योजना संसोधन सहित ६४ योजनाका लागि बजेट व्यवस्थापन गरिएको उहाँले बताउनुभयो ।