नेपाल कम्युनिष्ट पार्टी(एमाले)को जिल्ला कमिटी म्याग्दीको १०औं जिल्ला अधिवेशन आउँदो माघ १२ र १३ गते जिल्ला सदरमुकाम बेनीमा हुने भएको छ । नेकपा(एमाले) जिल्ला कमिटीको नयाँ नेतृत्व चयनका लागि हुन लागेको अधिवेशनको तयारी शुरु भएर प्रचार तथा प्रतिनिधि छनौटलाई अगाडी बढाइएको एमाले म्याग्दीले जनाएको छ ।
जिल्ला पार्टी कार्यालयमा शुक्रवार आयोजित पत्रकार सम्मेलनमा पार्टीका जिल्ला अध्यक्ष देवेन्द्रबहादुर कटुवालले अधिवेशनको बारेमा जानकारी गराउनुभएको थियो । उहाँले अधिवेशनमा वडागत, जनसङ्गठन, जिल्ला कमिटीका पदाधिकारी र सदस्यसहित ४ सय १९ जना प्रतिनिधिहरुले सहभागिता जनाउने बताउनुभयो । म्याग्दीमा नेकपा एमालेका ३ हजार ४ सयजना पार्टी सदस्यहरु रहेको र पार्टी सदस्यको आधारमा उक्त संख्यामा प्रतिनिधि आउने जिल्ला अध्यक्ष कटुवालले बताउनुभयो ।
अधिवेशनमा अन्य क्षेत्रबाट २०, महिला १५ र दलित १० जना पार्टी सदस्य अर्थात् सङ्गठित सदस्यहरु बराबर एकजना प्रतिनिधि छनोट हुने एमालेको विधानमा व्यवस्था रहेको छ । यसैगरी आवश्यकता अनुसार ५ प्रतिशत अर्थात् १२ जना प्रतिनिधिहरु मनोनित गर्ने सकिने व्यवस्था समेत रहेको छ । मनोनित भएमा थपिएकासहित कुल ४ सय ३१ जना प्रतिनिधिहरु अधिवेशनमा प्रतिनिधिको रुपमा सहभागी हुन पाउने छन् ।
जिल्ला अधिवेशनको लागि आउँदो माघ ५ गतेभित्र प्रतिनिधिहरु छनौट गरेर सिफारिस गर्न वडा कमिटीलाई परिपत्र गरिएको एमाले अध्यक्ष केसीले बताउनुभयो । ४५ वटा वडाबाट वडागत रुपमा २ सय ४० जना प्रतिनिधिहरु अधिवेशनमा भाग लिन आउने एमाले म्याग्दीका उपाध्यक्ष बालकृष्ण सुवेदीले बताउनुभयो । पत्रकार सम्मेलनमा अधिवेशनका लागि तयार पारिएको नारासहितको लोगो समेत सार्वजनिक गरिएको थियो । १०औं अधिवेशनको लागि “दक्षिणपन्थी अवसरवाद र सङ्गठनात्मक अराजकतालाई पराजित गरौ, जबजको मार्गदर्शनमा समाजवादको आधार तयार गरौं” भन्ने नारा रहेको छ ।
अधिवेशन सफल बनाउन विभिन्न ७ वटा उपसमितिहरु गठन गरेर तयारीलाई अगाडि बढाइएको एमाले म्याग्दीले जानकारी दिएको छ । अधिवेशनको उद्घाटन गर्ने प्रमुख अतिथिको टुङ्गो लागेपछि कार्यक्रमस्थलको समेत टुङ्गो लाग्ने जनाइएको छ । पत्रकार सम्मेलन कार्यक्रममा नेकपा एमालेका केन्द्रीय सदस्य भूपेन्द्रबहादुर थापा, गण्डकी प्रदेश कमिटी सदस्य हरिकृष्ण श्रेष्ठ, एमाले म्याग्दीका उपसचिव एवं जनसङ्गठन समन्वय संयन्त्रका संयोजक थमसरा पुन लगायतको उपस्थिति रहेको थियो ।
