चढ्यो जाडो

काठमाडौं,१६ मंसिर- कानै छोप्ने गरी नीलो टोपी, रातो मफ्लर (गलबन्दी) र निलो जिन्समा लामो उलनको टिर्सट । रुखमा अडेस लगाएर उभिएका कलाकार नाजिर हुसैन बिन्दास मुडमा देखिन्छन् । उनले यो तस्बिर फेसबुकमा अपलोड गर्नेबित्तिकै उनका फ्यानहरूको कमेन्ट ओइरिन लाग्यो । उनको पहिरन हेर्दा जति न्यानो अनुभूति हुन्थ्यो उनले लेखेको स्टाटस झनै तातो थियो– ‘वार्म विन्टर’ । दुई शब्दमै नाजिरले जाडोप्रतिको प्रेमभाव दर्साएका छन् ।
पछिल्ला फिल्महरूमा फरक अभिनयका साथ जम्दै गइरहेका नाजिरको सम्बन्ध जाडोसँग भने नमिठो छ । सानैमा तीन पटकसम्म चिसोको कारण निमोनियाले सताएको अनभुव छ उनीसँग । ‘सक्दो चिसोदेखि जोगिनुपर्छ,’ उनी भन्छन्, ‘तर, मन पर्ने मौसम नै जाडो हो ।’
नाजिरले जाडो मौसमलाई चिसो भनेर चिनाउन चाहँदैनन् । न्यानो र बाक्ला पहिरनमा स्टाइलिस्ट देखिन मन पराउने उनी दावा गर्छन्– ‘विन्टर इज वार्म ।’ पछिल्लो फिल्म ‘गाँठो’ को प्रदर्शनको सिलसिलामा केही समयअघि अस्ट्रेलिया जाँदा उनले विन्टरका कपडा किनेर ल्याएका थिए । यतिले मात्रै उनको मन भरिएन ।
त्यसैले नेपालमै बनेका न्यानो कपडा किन्न उनी ठमेल पुगे । ‘जाडोमा अलि रफटफ लुक्स रुचाउँछु,’ उनी भन्छन्, ‘मफलर र टोपी छनोटमा अलि चुजी छु ।’ लङ उलनको टिर्सट लगाउन आफू निकै सोखिन रहेको उनले खुलाए ।जाडोमा चिसो नठान्नेहरूमध्ये, कत्थक नृत्यांगना नम्रता केसी पनि एक हुन् । प्राय: गर्मी मौसममा कपाल माथि लगेर बाँध्ने नम्रताको जाडो लागेपछि ड्रेसअपसँगै हेयर स्टाइल पनि चेन्ज हुन्छ ।
फेसन खासै फलो नगर्ने भए पनि उनी हल्का स्टाइलिस्ट हुन चाहन्छिन् । यसको छनक आफ्ना साथीहरूलाई उनले फेसबुकमा फोटो अपलोड गरेरै बताएकी छन् । ‘विकज्, विन्टरर्स आर वार्म’ स्टाटस लेखेकी नम्रता खुल्ला कपालमा देखिएकी छन् । कलरफुल उलनको स्विटर लगाएकी उनले जाडोलाई न्यानो भावमा दर्साएकी हुन् । हाइनेक स्टाइलको स्विटर उनको रोजाइमा पर्छ । यसले मफलर र स्विटर गरी ‘टु’ इन ‘वान’ को काम गर्ने नम्रताको दावा छ । सुन्तला र बदाम खान पाइने हुँदा पनि उनलाई जाडो सिजन मन पर्छ । तर, बाक्लो र भद्दा कपडा लगाएर मोटी देखिन चाहँदिनन् उनी । त्यसैले नम्रता पातला र न्याना लुगाको खोजीमा हुन्छिन् ।
जाडो मौसम लागेसँगै युवा जमातमा कस्तो पहिरन कसरी लगाउने चिन्ता बढ्न थाल्छ । फेसन डिजाइनर तेन्जिङ छितेन भुटियासँग यसको अचुक उपाय छ । उनी न्यानो देखिन डार्क कलर अपनाउन सल्लाह दिन्छन् । जस्तै, निलो डार्क, पिंक डार्क, एल्लो डार्क, ब्ल्याक, ग्रिन डार्क लगायत गाडा रंगका पहिरनले जाडोमा न्यानोपन महसुस गराउने तेन्जिङले बताए । विन्टरमा प्रिन्टेड पहिरन कम चल्छ भन्ने धारणा उनी यो पटकको विन्टर क्रिएसनबाट हटाउन खोज्दै छन् । उनले आफ्नै कलेक्सनमा केही काम गर्दै छन्, जुन विन्टर टार्गेट प्रिन्टेड ड्रेस हुने छन् ।
‘फेसन डिजाइनरका लागि जति धेरै मौसम परिवर्तन भयो उति क्रिएटिभ बनाउँदो रहेछ,’ उनी थप्छन्, ‘जाडोमा मेरा कस्टमरलाई कसरी न्यानो र फेसनेबल देखाउनेबारे गम्भीर छु ।’ जाडोमा उलनका पातला तर, न्याना पहिरन लगाउन सकिने उनले बताए । उनले हाइनेक, क्लोज स्टाइल र कलर प्रिन्टका पहिरन बनाएको बताए । भन्छन्, ‘लगाउन जाने विन्टर न्यानो मौसम हो ।’