पोखरा । “जीवन र जगतको यथार्थ वोधको लागि अक्षरयात्रा” भन्ने मूलमन्त्र लिई गजलसन्ध्या र नवनीत साहित्य सागरद्वारा २०६२ सालदेखि अविच्छिन्न रुपमा संचालन गर्दै आइरहेको पर्यटकीय साहित्यिक कार्यक्रम “अक्षरयात्रा”को १९९औं श्रृंखला जेष्ठ महिनाको तेस्रो शनिबार प्राकृतिक सौन्दर्यले भरिपूर्ण पर्यटकीय स्थल मट्टीखानमा सम्पन्न भयो ।
सिर्जनशील व्यवशायिक कृषक समूह, पोखरा–२१ भीरस्वाँराद्वारा स्थानीय व्यवस्थापन गरिएको सो कार्यक्रममा पोखरा र आसपासका क्षेत्रबाट जुटेका तीन दर्जनजति सर्जकहरुले तत्स्थानमा पुगेपछि डेढदुई घण्टाको समय लिई रमणीय प्राकृतिक दृष्यहरुको अवलोकन गर्दै काव्य रचना गरेपछि स्थानीय लाम्पोखरीको नजिकै पर्ने महादेवको मन्दिरको पटांगिनीमा कार्यक्रम संचालन गरियो ।
सिर्जनशील व्यवशायिक कृषक समूह तथा कौसीबारी करेसाबारी फलफूल एवं तरकारी उत्पादनसंग सम्बन्धित अभियन्ता कृषकहरु , संगठनका पदाधिकारी एवं स्थानीय कृषकहरुको उपस्थितिमा संचालित उक्त कार्यक्रममा कौसी खेतीका अभियन्ता नारायण अधिकारीले आँफु कौसी खेतीमा प्रतिवद्ध भएकोले नै काठमाण्डौबाट आइपुगेको बताउँदै काव्य वाचन गरे ।
कृषि कार्यालयका प्रतिनिधि मनहर कडकियाले किसानहरुकको भलाईका लागि सक्दो सहयोग गर्ने बताए भनें नेपाली लेखक संघ, गण्डकी प्रदेशका अध्यक्ष डा. ईश्वरमणि अधिकारी, लक्ष्मण थापा, अमृत, गण्डकी साहित्य संगमका अध्यक्ष भीम रानाभाट, अम्बिकाप्रसाद भट्टराई, भावना रानाभाट, शिबहरी बास्तोला, शिव त्रिपाठी, कृष्ण सुवेदी, भरत आचार्य, सीता बराल, सिर्जना ढकाल, अनिता दाहाल, शुभ शर्मा, जिज्ञासु सापकोटा, सुजीत चौधरी, बिजय अधिकारी, लाल कार्की ‘अन्जान’, लेखनाथ खनाल, मनोज बिक’ भावुक’, सूरज उपाध्याय, सबिता बराल, रमा खतिवडा, अमृता पोख्रेल, विश्व अधिकारी, भेषराज पौडेल लगायतले कविता, मुक्तक, गजल र गीत वाचन तथा गायन गरेका थिए ।
सिर्जनशील व्यवशायिक कृषि समूहका तर्फबाट बिजय पौडेलले स्वागत गरेको उक्त कार्यक्रमलाई आर्थिक एवं नैतिक सहयोग गर्ने हाल अमेरिकामा कार्यरत यम पौडेलले पठाएको शुभकामना तथा कविता पनि वाचन गरिएको थियो । गजल सन्ध्याका अध्यक्ष वसन्त विनोद र समूहका अध्यक्ष माधव पौडेलको संयुक्त सभापतित्वमा सम्पन्न उक्त कार्यक्रमको संचालन गजल सन्ध्याका सचिव त्रुपकले गरेका थिए ।
