राप्रपाले मनायो स्थापना दिवस

राष्ट्रिय प्रजातन्त्र पार्टीले आफ्नो ३४ औं स्थापना दिवस बेनीमा एक कार्यक्रमको आयोजना गरेर शुभकामना आदानप्रदान गर्दै मनाएको छ ।
३४ औं स्थापना दिवसको अवसर पारेर राष्ट्रिय प्रजातन्त्र पार्टी जिल्ला कार्यसमिति म्याग्दीले आयोजना गरेको कार्यक्रममा पूर्व मन्त्री एवम् राप्रपाका केन्द्रीय सदस्य भीमप्रसाद गौचनले राज्यको बैकल्पीक शक्तिका रुपमा राप्रपा रहेको बताउनुभयो । प्राविधिक रुपमा राप्रपा कुनै समय केही कमजोर बनेको भए पनि गएको प्रतिनिधिसभा निर्वाचन पछि आफ्नो धारमा आउन लागेकोले सबैले आ–आफ्नो ठाउँबाट भूमिका खेल्नु पर्ने बताउनुभएको थियो ।
राप्रपा म्याग्दीका अध्यक्ष बिरबहादुर थापाको अध्यक्षता तथा देवेन्द्र घिमिरेको सञ्चालनमा भएको कार्यक्रममा गत प्रतिनिधिसभा निर्वाचनका उम्मेदवार एवम् केन्द्रीय सदस्य जगतप्रसाद गौचनले मन्तव्य राख्नुभएको थियो । पार्टी कार्यालय न्यूरोडमा भएको कार्यक्रममा दुई दर्जन बढी नेता कार्यकर्ताको सहभागिता रहेको अध्यक्ष थापाले बताउनुभयो ।