अमृत बास्कुने
जीवनको अस्तित्व रहनका लागि बनस्पती पनि अस्तित्वमा रहनु पर्ने बेनीमा आयोजित एक कार्यक्रममा बताइएको छ ।
सामुदायिक वन उपभोक्ता महासंघको म्याग्दीको जिल्ला अधिवेशनमा बोल्दै जिल्ला समन्वय समिति म्याग्दीका प्रमुख राजकुमार थापाले मानव मात्रै नभएर जीवस्तीत्व रहनका लागि वनस्पति पनि रहनु पर्नेमा जोड दिनुभएको हो । समुदायले वन जोगाउने भए पनि उनीहरुले नै प्रयोग गर्नका लागि राज्यको नीति केही अप्ठेरो भएको बताउँदै उहाँले जीवअस्तित्व सँग जोडिएको वनलाई उपभोक्ताले प्रयोग गर्नपाउनु पर्ने बताउनुभयो । जीवन रहनका लागि वनस्पती र वनस्पती रहनका लागि जीवन चाहिने भएकाले यसलाई जोगाउँदै प्रयोग पनि गर्न पाउनु पर्ने बताउनुभयो । राज्यको नीतिमा भएको अप्ठेरो पद्धतिले गर्दा संरक्षण गर्नेहरुले त्यसको फाइदा सोचेअनुरुप लिन नपाएको उहाँको भनाई थियो ।
सामुदायिक वन उपभोक्ता महासंघका केन्द्रीय सदस्य हरि बास्तोलाले सामुदायिक वनलाई उपभोक्ता समितिले संरक्षण तथा सम्बद्र्धन गर्ने गरेको भए पनि उनीहरुलै नै त्यसको सहज उपभोग गर्न नपाएको बताउनुभएको थियो । उहाँले जसले जोगाउँछ प्रयोग पनि उसले गर्न पाउनै पर्छ भन्नुभयो । आफूले मेहनत गरेर संरक्षण गर्दै हुर्काएको चीजको प्रयोग आफैले गर्न नपाउने कस्तो प्रकारको कानुन राज्यले बनायो उहाँले प्रश्न गर्नुभयो ।
डिभिजन वन कार्यालय म्याग्दीका अधिकृत नरवहादुर क्षेत्रीले प्राकृतिक श्रोतको उपभोग गर्न उपभोक्ताले नपाउनुका साथै उद्यमीहरुको पनि श्रोत कमजोर रहेको बताउनुभयो । नीति भित्र रहेर काम गर्नु पर्ने हो राज्यको नीतिलाई आत्मसाथ गर्नु पर्ने सबैको कर्तव्य भएको क्षेत्रीको भनाई थियो ।
कार्यक्रममा सामुदायिक वन उपभोक्ता महासंघ गण्डकी प्रदेश अध्यक्ष कालिदास सुवेदी, बेनी नगरपालिकाका प्रमुख सुरत केसी, सामुदायिक वन उपभोक्ता महासंघका गण्डकी प्रदेस सहसचिव सिता गुरुङ, सदस्य रेशम बानियाँ, बेनी नगर महासंघका अध्यक्ष सूर्यप्रकाश बानियाँ लगायतले बोल्नु भएको थियो ।
सामुदायिक वन उपभोक्ता महासंघ म्याग्दीका अध्यक्ष जीवन कार्कीको अध्यक्षतामा भएको कार्यक्रममा उपाध्यक्ष सुन्तली जिसीले स्वागत गर्नुभएको थियो भने सचिव तेजकुमारी शेरपुजाको सञ्चालनमा सम्पन्न भएको थियो ।
मानव जीवन वनस्पती सँग जोडीएको छ : थापा
