पार्टी संगठन बलियो भए संस्थापकको सपना पुरा हुन्छ: स्थायी कमिटी सदस्य थापा

नेकपा एमालेका स्थायी कमिटी सदस्य थममाया थापाले पार्टी सङ्गठनलाई बलियो बनाउन सकेमा संस्थापकहरुको सपना पुरा हुने बताउनुभएको छ ।
नेपाल कम्युनिष्ट पार्टीको स्थापना दिवस आयोजित नेकपा एमाले म्याग्दीले आयोजना गरेको कार्यक्रममा स्थायी कमिटी सदस्य थापाले उक्तकुरा बताउनुभएको हो । पछिल्लो आम चुनावको जनमतका आधारमा पहिलो पार्टी नेकपा एमाले रहेकोले कसैको घेराबन्दीमा पनि नडगमगाइ मुलुक र जनताको हितमा एमाले केन्द्रीत भएको उहाँको भनाई थियो ।
नेकपा (एमाले) जिल्ला कमिटी म्याग्दीले नेपालमा २००६ सालमा नेपाल कम्युनिष्ट पार्टी स्थापना भएको ७४ वर्ष पुरा गरी ७५ वर्षमा प्रवेश गरेको अवसरमा स्थापना दिवस मनाउँदै गर्दा थापाले प्रचार भन्दा पनि काममा ध्यान केन्द्रीत गरेर अगाडी बढ्नु पर्नेमा जोड दिनुभयो । दिवसको अवसरमा एमाले म्याग्दीले शहिद स्मृति भवनमा एक औपचारिक कार्यक्रमको आयोजना गरी नेपाल कम्युनिष्ट पार्टीको स्थापना दिवस मनाइएको नेकपा एमाले म्याग्दीले जनाएको छ ।
पूर्व मन्त्री समेत रहेकी स्थायी कमिटी सदस्य थापाले पार्टीको निर्देशनअनुसार काम गर्नुपर्ने र नेपाली जनताको चाहना पुरा गर्न सकेमा शहिद तथा कम्युनिष्ट पार्टीका संस्थापकहरुले पु¥याएको योगदानको कदरका साथै उहाँहरुको सपना पनि साकार हुनेमा जोड दिनुभएको थियो ।
नेपालमा स्थापना भएका कम्युनिष्ट पार्टीले नेतृत्व गरेका सरकारहरुले अन्य पार्टीहरुको तुलनामा जनपक्षीय र देश विकासका लागि कामहरु गरेको बताउँदै उहाँले त्यसमा पनि एमालेको नेतृत्वमा बनेका सरकारले धेरै राम्रा कामहरु गरेको दावी गर्नुभएको छ ।
एमाले म्याग्दीका अध्यक्ष देवेन्द्रबहादुर केसीको अध्यक्षता, उपाध्यक्ष बालकृष्ण सुवेदीको स्वागत र सचिव सुरत केसीको सञ्चालनमा सम्पन्न भएको थियो । कार्यक्रममा एमाले केन्द्रीय सदस्य एवं म्याग्दी जिल्ला सहइन्चार्ज नरदेवी पुन, एमाले गण्डकी प्रदेश कमिटी सचिवालय सदस्यहरु हरिकृष्ण श्रेष्ठ, खुमबहादुर बानियाँ र देवबहादुर घलेको विशेष उपस्थिति रहेको थियो ।
सालमा भारतको कोलकातामा नेपाल कम्युनिष्ट पार्टीको स्थापना भएको थियो । राणाशासनकै समयमा २००६ साल वैशाख ९ गते पुष्पलाल श्रेष्ठको अगुवाइमा नरबहादुर कर्माचार्य, निरन्जन गोविन्द वैद्य, नारायणविलास जोशी लगायतले नेपालमा पहिलोपल्ट नेपाल कम्युनिष्ट पार्टीको स्थापना गर्नुभएको थियो भने महासचिव पुष्पलाल श्रेष्ठ बन्नुभयो । २०१५ सालमा भएको पहिलो आम निर्वाचनमा कम्युनिष्ट पार्टीले ४ सिट जितेको थियो । त्यसक्रममा केशरजङ्ग रायमाझीले पञ्चायती व्यवस्थाको समर्थन गरेलगत्तै कम्युनिष्ट पार्टी औपचारिक विभाजन भएको थियो ।
नेपालका कम्युनिष्ट पार्टीहरु धेरैपटक फुट र जुटको शृङ्खलामा सामेल भएका छन् । शृङ्खलाबद्ध टुटफुट र सत्ताकेन्द्रित राजनीतिले नेपालमा कम्युनिष्ट आन्दोलन धरापमा परेको टीका–टिप्पणी हुँदै आएको छ । २०७४ सालको निर्वाचनमा गठबन्धन बनाएर गएका एमाले र माओवादी केन्द्र २०७५ सालको जेठ ३ गते एउटै पार्टी बनाउन सफल भए पनि फेरि अलग पार्टी भए ।