पोखरा । पोखरा महानगरपालिका १९ नं वडाका वडाध्यक्ष पुष्पेन्द्र पाण्डेले बैंक तथा वित्तिय संस्थाबाट ऋण लिने र तिर्नमा बदनीयत भएका केही व्यक्तिले यसलाई मुद्दा बनाएर सोझा साझा जनतालाई ऋण मिनाहाको झाँसामा पारि राजनितिक रंग दिन खोजिएको बताएका छन्।
केन्द्रीय कार्यालय बाग्लुङ्गमा रहेको धौलागिरी लघुवित्त वित्तिय संस्था लिमिटेडको शाखा कार्यालय पोखरा १९ ले आइतबार लामाचौरमा आयोजना गरेको संस्थाको केन्द्र प्रमुख समुह गोष्ठी तथा वित्तिय साक्षरता कार्यक्रमको उद्घाटन गर्दै सो कुरा बताएका हुन्।
घुमाउरो पारामा मेडिकल व्यवसायी दुर्गा प्रसाईंप्रति इंगित गर्दै उनले यस्ता व्यक्तिको पछि नलाग्न र भ्रममा नपर्न सबैलाई आग्रह समेत गरेका छन्। ढिलो चाँडो भएपनि लिएको ऋण सबैले तिर्नुपर्ने र यसमा वित्तिय संस्थाले पनि ऋणीलाई सहुलियत तथा समय प्रदान गर्नुपर्ने सुझाव दिए। विशिष्ट अतिथि संस्थाका केन्द्रिय अध्यक्ष ईश्वरलाल राजभण्डारीले एकभन्दा बढि वित्तिय संस्थासँग ऋण लिने परिपाटीले गर्दा महिला दिदिबहिनीहरू थप आर्थिक मारमा परेको बताए। धेरै वित्तिय संस्थासँग ऋण लिने र आय आर्जनमा लगानी नगरि अन्यत्र खर्च गर्ने गरेकाले पनि लिएको ऋण समयमा तिर्न नसक्दा केही महिलाहरूमा मानसिक तनाव बढेको बताए।
सञ्चालक सृजना थापा मगरले ईमान्दारीता नै व्यवसायको मुख्य कडी भएकोले ईमान्दार बन्न सबैलाई आग्रह गरिन्। कास्की खबरका समाचार प्रमुख सागर कार्कीले देशमा चलिरहेको हालको आर्थिक मन्दीलाई पनि मध्यनजर गरि विभिन्न केन्द्रका सदस्य महिलाहरूको आर्थिक समस्य बुझेर वित्तिय संस्थाले आफ्नो लगानी उठाउने वातावरण सहज र सदस्यमुखी बनाउन सुझाव दिए।
स्वागत गर्दै शाखा कार्यालय लामाचौरका प्रमुख राधिकादेवी शर्माले समाजमा छरिएर रहेका साना साना पुँजीलाई एकत्रित गरी हुँदा खाने गरिब निमुखाहरूको आर्थिकस्तर उकास्न लघुवित्तले लगानी गरिरहेको बताइन्।
कार्यक्रमको उद्धेश्यमाथि प्रकाश पार्दै कर्जा तथा ऋण असुली विभाग केन्द्रका सहायक टंकप्रसाद ढकालले वित्तिय संस्था र सदस्यबीचको सम्बन्धलाई सुमधुर बनाउन कार्यक्रमको आयोजना गरिएको बताए। कार्यक्रमको माध्यमबाट संस्थाले हालसम्म गरेका गतिविधि एवम् समस्याबारे छलफल गर्ने र प्राप्त सुझावलाई ग्रहण गरी थप परिमार्जित हुँदै संस्थाको कार्यलाई अगाडी बढाउने जानकारी दिए।
लेखनाथ शाखा प्रमुख ईश्वरा तिवारीले लघुवित्तले महिला दिदिबहिनी बीच आपसी सहयोग र सदभावको भावना जागृत गरेको बताईन्।सहभागी महिलाहरूको तर्फबाट पार्वती मुल्मीले लघुवित्तको कर्जा लगानीले आफ्नो व्यवसाय सञ्चालन गर्न ठुलो मद्दत गरेको बताईन्। कार्यक्रममा सरास्वती गौतम र सानु भुजेल लगाएतले पनि बोलेका थिए।
नेपाल राष्ट्र बैंकबाट ‘घ’ वर्गको इजाजत प्राप्त यो संस्थाले विपन्नवर्ग र निम्न आयस्तर भएका तर लगानीको अभावमा पछाडी परेका महिलाहरूलाई समुहमा लघुकर्जा प्रदान गर्दै आइरहेको छ। समुहमा कर्जा लगानी गरिदिंदा आर्थिक भार सबैमा समान रूपमा बाँडिने र आर्थिक उन्नतीका लागि केही गरौं भन्ने महिलाहरूको पनि सपना साकार हुने संस्थाले जनाएको छ।
संस्थाको देशैभरि गरि २० जिल्लामा शाखा सञ्चालनमा रहेको छ। लामाचौर शाखा अन्तर्गत ६५ वटा केन्द्रले सेवा प्रदान गरिरहेका छन्। वित्तिय साक्षरता कार्यक्रममा विभिन्न केन्द्रका गरि करिब ५० जना महिलाको सहभागिता थियो। संस्थाका केन्द्र नं ५३ का प्रमुख रेणुका नेपालीको अध्यक्षतामा भएको कार्यक्रमको सञ्चालक पोखरा क्लष्टरका अनुगमन अधिकृत महेश प्रसाद अधिकारीले गरेका थिए।
