बेनी नगरपालिका क्षेत्रको १० ओटा वडाको ५० स्थानको पिउने पानीको नमुना परीक्षण गर्दा १९ स्थानमा फिकल कोलिफर्म भेटिएको छ जसले गर्दा स्थानियहरू शुद्ध पानी पिउनबाट वञ्चित भएका छन् ।
बेनी नगरपालिकाका स्वास्थ्य शाखा प्रमुख जनस्वास्थ्य अधिकृत चन्दन सुवेदीका अनुसार बेनी नगरपालिका–१ को शिवालय धाराको पानी, वडा ४ को तातोपानी कुण्ड, बेनी नगरपालिका–५ को पुरुण्डी तथा चिप्लेटी, वडा नम्बर ६ को गौरीधारामा फिकल कोलिफर्म भेटिएको हो ।
त्यस्तै बेनी नगरपालिका –९ को गलेश्वर, काउले तथा घतान क्षेत्रमा पनि जिवाणु भेटिएको छ । बेनी नगरपालिका–१० पात्लेखेत क्षेत्रको गैरीकुवा, पात्लेखेत स्वास्थ्य चौकी, पाइजागाउँको धारो पानीको नमुना परीक्षण गर्दा अधिकांस पिउने पानीमा फिकल कोलिफर्म भेटिएको हो ।
बेनी नगरपालिका–४ को राक्से खानेपानी, तातोपानी कुण्ड सिम मुलको पानीमा कोलिफर्म भेटीएको हो । त्यस्तै बेनी नगरपालिका–५ को पुलाडाँडा, चिप्लेटी, भुलभुले, पुरुण्डी, ६ नम्बर वडाको वडा कार्यालय नजिकैको गौधारा, ९ नम्बर वडाको गलेश्वर बजार मुल, गलेश्वर बजारखाने पानी, घतान हेल्थपोष्ट, झाक्रीपानी मुल, भुतपानी र बेनी नगरपालिका–१० को पात्लेखेत स्वास्थ्य चौकी, गैरि कुवा, पाइजा गाउँमा संकलन गरिएको पिउने पानीको नमुनामा फिकल कोलिफर्म भेटिएको स्वास्थ्य शाखा प्रमुख सुवेदीले बताउनुभयो ।
स्वास्थ्य कार्यालय म्याग्दीका सूचना अधिकारी गणेश सुवेदीका अनुसार फिकल कोलिफर्म भनेको मानव दिसामा पाइने जिवाणु हो र त्यो जिवाणु मानव शरिरमा प्रवेश गरेपछि झाडापखाला लगायतका रोगको संक्रमण हुन सक्छ । अहिले परिक्षण गरिएको नगरपालिका क्षेत्र भित्रको खानेपानीमा ५ वटा वडामा त्यस्ता व्यक्टेरिया भेटिएको र अन्यमा पनि परीक्षण गर्ने तयारी भए पनि काम थालनी नभएको उहाँको भनाई छ ।
नगरपालिका क्षेत्रमा संकलित पिउने पानीको नमुनाले नगरपालिका क्षेत्र भित्र रहेको पिउने पानीको शुद्धतामा प्रश्न चिन्ह उठेको छ । बेनी अस्पतालका मेडिकल अफिसर डाक्टर गोविन्द पोखरेलले पानीमा फिकल कोलीफर्म ब्याक्टेरीया भेटिएको हुँदा त्यहाँको पानी शुद्धिकरण तथा उमालेर मात्रै पिउन पर्ने बताउनुहुन्छ । बालबालिका तथा जेष्ठ नागरिकहरूमा छिटो प्रभाव पार्न सक्ने हुनाले समयमै सम्बन्धित पक्ष चनाखो हुन पर्ने उहाँको भनाई छ ।
नगर क्षेत्रको पानीको नमुनामा झण्डै ४० प्रतिशतमा मानव दिसाको मात्रा अर्थात् फिकल कोलिफर्म भेटिएको र त्यसबारेमा नगरप्रमुखलाई जानकारी गराइएको बेनी नगरपालिकाका जनस्वास्थ्य अधिकृत सुवेदीले बताउनुभयो । नगर प्रमुखले वडा अध्यक्ष सँगको मिटिङ राखेर योजना बनाउने बताउनुभएको उहाँको भनाई छ ।
