एकीकृत वस्तीमा मोनाले बनाएको प्रवेशद्वार उद्घाटन

म्याग्दी प्रवासी नेपाली संघ मोना अन्तर्राष्ट्रिय कार्यसमितिको आयोजनामा शनिबार मालिका गाउँपालिका–७, विममा रहेको एकीकृत वस्तीमा निर्माण भएको प्रवेशद्वार उद्घाटन भएको छ ।
मोना एकीकृत वस्ती प्रवेशद्वारको जिल्ला समन्वय समिति म्याग्दीका प्रमुख राजकुमार थापा, म्याग्दी प्रवासी नेपाली संघ मोनाका अध्यक्ष अमर छन्त्याल र मोनाका तत्कालीन अध्यक्ष तथा पुनःनिर्माण समितिका मूल संयोजक समेत रहेका हालका प्रमुख संरक्षक ओमनारायण जुग्जालीले संयुक्त रुपमा उद्घाटन गरेका हुन् ।
करिब सातलाख रुपैयाँको लागतमा मोनाले एकीकृत वस्तीमा प्रवेशद्वार र सहयोगीहरुको शिलालेख तयार गरेको जनाएको छ । प्रवेशद्वार र सहयोगदाताहरुको नामावली कोरिएको शिलालेखको उद्घाटन गर्दै समन्वय प्रमुख थापाले मोना म्याग्देलीहरुको विपद्को साथी र म्याग्दीमा विकासको सहयोगी भएको बताए । उनले २०७७ साल असार २५ गतेको वर्षासँगैको पहिरोबाट विस्थापितहरुलाई घर बनाइदिएर मोनाले महान् कार्य गरेकोमा आभार प्रकट गरेका छन् ।
कार्यक्रममा मोनाका संरक्षक जुग्जालीले २०७७ सालको बाढी पहिरोपश्चात् मोनाले जिल्लाभर दुई करोडको लागतमा ४० वटा घर निर्माण गरी हस्तान्तरण समेत गरिसकेको बताए ।
मोनाका अध्यक्ष अमर छन्त्यालले प्राकृतिक विपत्तिमा परेर घरबारविहिन भएकाहरुलाई घर निर्माण गरिदिने कार्यमा आर्थिक, भौतिक तथा नैतिक रुपमा सहयोग गर्ने सबैलाई धन्यवाद दिएका छन् । कार्यक्रममा मालिका गाउँपालिकाका अध्यक्ष बेगप्रसाद गर्बुजा, निवर्तमान अध्यक्ष श्रीप्रसाद रोका, किसानी माविका प्रधानाध्यापक जंगबहादुर गर्बुजा, वडा अध्यक्ष टकलाल पुन, मोना ओसियाना क्षेत्रीय संयोजक गोकुल भण्डारीले सामाजिक क्षेत्रमा मोनाले पु¥याएको योगदानको चर्चा र प्रशंसा गरेका थिए ।
कार्यक्रम मोना अन्तर्राष्ट्रियका उपाध्यक्ष सूर्जे भट्टचनको स्वागत र सचिव सुबोध बरुवालको सञ्चालनमा सम्पन्न भएको थियो । कार्यक्रममा स्थानीले बाजागाजा र फुलमालासहित अतिथिहरुलाई स्वागत समेत गरेका थिए ।