असोज २४ गते । अपहरण शरीर बन्धक, डाँका र संगठीत अपराध कसूरमा ६ जनालाई पुर्पक्षका लागि जेल चलान गरिएको छ ।
सोमबार जिल्ला अदालत काठमाडौंको आदेशले छ जनालाई पुर्पक्षका लागि केन्द्रीय कारागार जगन्नाथदेवल सुन्धारा चलान गरिएको हो ।
कारागार चलान हुनेमा गोरखाको सिरानचौक–७ घर भइ हाल काठमाडौं धापासी बस्ने २८ वर्षीय लक्षुमण भन्ने लक्ष्मण गुरूङ, सर्लाहीको लालबन्द–११ घर भइ हाल काठमाडौं–२६ बस्ने २९ वर्षीय रोहित मगर भन्ने पुर्ण बहादुर पुलामी मगर, प्यूठानको प्युठान–८ बागदुला घर भइ हाल काठमाडौं–२६ बस्ने २८ वर्षीय विशाल मगर भन्ने रमेश रुचाल, बर्दियाको राजापुर–१० घर भइ हाल काठमाडौं–१६ बस्ने २८ वर्षीय शिव सुनार, गोरखाको आरुपोखरी आरुघाट–७ घर भइ हाल काठमाडौं रानीबारी बस्ने ३७ वर्षीय कर्ण बहादुर गुरुङ र नुवाकोटको शिवपुरि–६ घर भइ हाल काठमाडौं टोखा बानियाटार बस्ने २७ वर्षीय बिनोद के.सी.भन्ने विनोद गौतम रहेका छन् ।
उनीहरुले असोज १८ गते काठमाडौं–२६ कपुरधारास्थित सडकमा ओखलढुङ्गाको चिसापानीका २६ वर्षीय सूर्य बहादुर राई र लाजिम्पाटस्थित एउटा घरमा रहेका चिनियाँ नागरीकलाई केही काम छ भन्दै बोलाएर त्यसको करिब १ घण्टापछि उक्त चिनियाँ नागरिकलाई सुरक्षित साथ फिर्ता लैजाने भए एक करोड नगद लिएर आउन राईलाई भनेको प्रहरीले जनाएको छ ।
प्रहरी परिसर टेकुका अनुसार प्रहरीलाई सूचना प्राप्त हुन साथ तत्कालै प्रहरीको विशेष टोलीले खोज तथा उद्धार गरेको थियो । खोज तलासका लागि खटेको प्रहरी टोलीले अपहरणमा परेका चिनियाँ नागरीक र सूर्य बहादुर राईलाई काठमाडौं–२६ नयाँ बसपार्कस्थित मित्रनगरमा रहेको न्यू स्वर्गद्वारी प्यूठान होटल एण्ड लजबाट सकुसल उद्धार गरेको थियो ।
उनीहरुमाथि मुलुकी अपराध संहिता २०७४ को परिच्छेद–१७ को अपहरण वा शरीर बन्धकसम्बन्धी कसूरमा सजाय हुने प्रहरी परिसर टेकुले जनाएको छ ।
