राष्ट्रिय प्रजातन्त्र पार्टीका केन्द्रीय अध्यक्ष राजेन्द्र प्रसाद लिङ्देनले अब देशको नेतृत्व फरक बिचारले गर्नु पर्ने बताउनुभएको छ ।
हिमाली जिल्ला म्याग्दीको बेनीमा आयोजित राष्ट्रिय प्रजातन्त्र पार्टीको पार्टी प्रवेश तथा बृहत आमसभामा राप्रपा अध्यक्ष लिङ्देनले पञ्चायत पछिको तीन दशक कम्युनिष्ट र कांग्रेसले नेतृत्व गरेको हुनाले अब फरक बिचार बोक्नेले नेतृत्व गर्नु पर्ने बताउनुभएको हो । अहिले सम्म मुलुकको नेतृत्वमा कम्युनिट र कांग्रेसले धेरै गरेको हुनाले अब फरक बिचार बोक्ने राप्रपाले गर्नु पर्ने बताउनुभएको थियो । लिङ्देनले भन्नुभयो–व्यवस्था मात्रै नभएर नेतृतव पनि अब बदलिनु पर्छ ।
जिल्ला विकास समितिका पूर्व सभापति चक्रपाणी आचार्यलाई नेपाली कांग्रेसबाट राप्रपा भित्राउनुका साथै अन्य विभिन्न पार्टीबाट पनि राप्रपामा प्रवेश गर्नेहरुलाई सदस्यता वितरण गर्दै अध्यक्ष लिङ्देनले मुलुक चक्रब्यूहमा फसेकोले त्यसबाट बाहिर निकाल्ने जिम्मेवारी आफूहरुको रहेको बताउनुभयो । अध्यक्ष लिङ्देनले देशमा भएका ठूला पार्टीहरुले गर्नु पर्ने भए पनि उनीहरुबाट आँट नगरेको कारण राप्रपाले बैदेशिक हस्तक्षेप रोक्नका लागि पनि लाग्ने बताउनुभयो । विदेशीको साथ भएन भने चुनाव जित्न, मन्त्री तथा प्रधानमन्त्री हुन सकिदैन भन्ने पराधिन मानसिकता बोकेका राजनैतिक दलहरुलाई परास्त गरेर देशको नेतृत्वमा आफूहरु पुग्नु पर्ने बताउदै देश बर्बाद हुनबाट जोगाउन आफूहरु चाहिने बताउनुभयो ।
देशको राजनीति अनि व्यवस्था परिवर्तन गरिनु पर्ने भएकोले आफ्नो पार्टीबाटै परिवर्तन थालिएको लिङ्देनको भनाई थियो । नेतृत्व परिवर्तन नगरे सम्म विकास नहुने भएकोले सबै स्थानको नेतृत्व परिवर्तन गर्दै अगाडी बढ्नु पर्ने आवश्यकताका लागि सबैले अहिले मुलुक परिवर्तनका लागि आफूहरुलाई मतदान गर्नु पर्ने बताउनुभयो ।
देशका कृषकलाई पोटास र युरिया चाहिने भए पनि कहिले पोटास दिन्छ कहिले युरीया मात्रै । कृषिमा निर्भर देशमा कृषकलाई चाहिने चिज ल्याउन नसक्ने नेतृत्वलाई अब हटाउन पर्छ लिङ्देनले भन्नुभयो ।
देशका ठूला दलहरुको आलोचना गर्नमा बढी केन्द्रीत हुनुभएका लिङ्देनले राजनैतिक दलहरुले राजतन्त्र विरुद्धमा जनतालाई भड्काएको बताउनुभयो । उहाँले राजतन्त्रको अन्त्य सँगै राजाको सम्पत्ती खोजतलासका लागि बनेको समितिले कुनै प्रगति नगरेको बताउँदै भन्नुभयो–मेरै छिमेकी कृष्ण सिटौलाको संयोजकत्वमा समिति बनेको थियो तर केही भेट्नु भएन, मैले सोध्ने गरेको छु पटकपटक तर उहाँले उत्तर सम्म पनि दिनु हुदैन लिङ्देनले भन्नुभयो ।
कार्यक्रममा डण्डपाणी उपाध्याय, चन्द्रमणी शर्मा, दिर्घ बानियाँलगायतले चारसय जनाले पार्टी प्रवेश गरेको राप्रपाले जनाएको छ । त्यसैगरी नेकपा एमाले धौलागिरी गाउँपालिका अध्यक्ष त्यागेर राप्रपा प्रवेश गरेका होमबहादुर थापालाई राप्रपाको प्रदेश समितीमा मनोनित गरीएको राप्रपाका युवा नेता देवेन्द्र क्षेत्रीले बताउनुभयो ।
जिल्ला स्तरीय कार्यक्रममा राप्रपाका प्रदेश अध्यक्ष पञ्चमान गुरुङ, पूर्व मन्त्री भीमप्रसाद गौचन, पूर्व मन्त्री जगत गौचनलगायतले मन्तव्य राख्नुभएको थियो ।
