अमृत सुवेदी/मुक्तीनाथ
राष्ट्रपति विद्यादेवी भण्डारीले हिमालपारीको जिल्ला मुस्ताङमा रहेको प्रसिद्ध धार्मिक तीर्थस्थल मुक्तिनाथ मन्दिरमा शनिबार दर्शन तथा पुजाअर्चना गरेकी छन् । राष्ट्रपति भण्डारी नेपाली सेनाको हेलिकप्टरमार्फत मुस्ताङको सदरमुकाम जोमसोम हुँदै मुक्तिनाथ पुगेर पुजाअर्चना गरेपछि फर्किएकी हुन् ।
जोमसोममा रहेको नेपाली सेनाको बज्रदल गणमा अवतरण गरेको हेलिकप्टरमार्फत नै मुक्तिनाथ मन्दिर पुगेकी राष्ट्रपति भण्डारीले मुक्तिनाथका १०८ वटा धाराको जलले स्नान गर्नुका साथै मन्दिरमा पुजा अर्चनापछि फर्किएको जनाइएको छ । राष्ट्रपति भण्डारीले मुक्तिनाथ मन्दिर दर्शनका लागि आउनेहरुलाई आवश्यकता परेको खण्डमा लक्षित वर्गलाई दिने गरी मन्दिर व्यवस्थापन समितिलाई २० थान न्यानो कम्बल प्रदान गरिन् ।
राष्ट्रपति भण्डारी सवार हेलिकप्टर नेपाली सेनाको व्यारेकमै अवतरण भएर त्यहीँबाट मुक्तिनाथतर्फ लागेको जोमसोम विमानस्थलका प्रमुख पुस्कलराज शर्माले जानकरी दिए । उनले राष्टपतिको भ्रमणलाई लक्षित गरेर हेलिकप्टर तीनवटा छुट्टाछुट्टै आएको र नियमित उडानका ४ वटा जहाजलाई पनि विमानस्थलमा अवतरण गराउनका लागि हवाई रुटको व्यवस्था मिलाइएको बताए ।
हिन्दु तथा बौद्ध धर्मावलम्बीहरुको साझा तीर्थस्थलको रुपमा रहेको मुक्तिनाथ मन्दिरमा पुजा तथा दर्शनका लागि राष्ट्रपति भण्डारी मुस्ताङ आएको प्रमुख जिल्ला अधिकारी नेत्रप्रसाद शर्माले बताएका छन् । जोमसोममा नेपाली सेनाको गणमा केही समय आराम गरेर मुक्तिनाथ मन्दिर दर्शनका लागि पुगेकी राष्ट्रपति भण्डारीले दर्शन, पुजा र अवलोकन गरेर फर्किएको प्रजिअ शर्माको भनाइ छ । राष्ट्रपति भण्डारीले मुक्तिनाथ मन्दिरमा दर्शन तथा पुजा गर्नुका साथै मन्दिर परिसरमा रहेको बौद्धस्तुपाको समेत अवलोकन गरेकी थिइन् ।
मुक्तिनाथ मन्दिरको दर्शन पुजा एवं बौद्ध स्तुपाको अवलोकनपछि राष्ट्रपति भण्डारी जोमसोमस्थित नेपाली सेनाको गणमा केही समय आराम गरेपछि बागलुङको ढोरपाटन शिकार आरक्षतर्फ लागेको प्रजिअ शर्माले जानकारी दिए । मुक्तिनाथ मन्दिरको दर्शन तथा पुजा अर्चनाका लागि राष्ट्रपतिले महत्व दिँदा मुस्ताङमा आन्तरिक तथा बाह्य पर्यटकहरुको आकर्षण बढ्न सक्ने अपेक्षा गरिएको छ ।
प्रसिद्ध मुक्तिनाथ मन्दिरको दर्शन तथा पुजा अर्चनापछि राष्ट्रपति भण्डारीले नेपालको एकमात्र शिकार आरक्षको रुपमा रहेको ढोरपाटन शिकार आरक्षको समेत अवलोकन गरेकी छन् । शिकार आरक्ष क्षेत्रको अवलोकनका लागि ढोरपाटन पुगेकी उनले वन्यजन्तु तथा वातावरण संरक्षणमा जोड दिएकी हुन् ।
राष्ट्रपति भण्डारीले ढोरपाटन शिकार आरक्ष तथा आरक्षको सुरक्षार्थ तैनाथ शत्रुमर्दन गुल्मको बारेमा जानकारी लिँदै संरक्षणमा राष्ट्रसेवक कर्मचारी, संरक्षणकर्मीले स्थानीय जनतालाई साथमा लिएर अगाडि बढ्नुपर्नेमा जोड दिएको ढोरपाटन शिकार आरक्षका प्रमुख संरक्षण अधिकृत वीरेन्द्रप्रसाद कँडेलले जानकारी दिए ।
ढोरपाटन शिकार आरक्षमा विदेशी शिकारी पर्यटकको बढ्दो आकर्षण, यहाँको पर्यटकीय, सुरक्षा तथा मध्यवर्ती क्षेत्र घोषणमा भैरहेको प्रगतिका बारेमा राष्ट्रपतिलाई जानकारी गराइएको थियो । आरक्ष कार्यालयका प्रमुख संरक्षण अधिकृत कँडेल र आरक्षको सुरक्षार्थ तैनाथ नेपाली सेनाको शत्रुमर्दन गुल्मका गुल्मपति सेनानी गोविन्द विष्टले आरक्षका गतिविधि र सुरक्षा स्थितिबारे प्रस्तुतीकरण गरेका थिए ।
