विद्यालय बन्द

बागलुङ, ३२ साउन – विप्लव नेतृत्वको नेकपा माओवादी निकट विद्यार्थी संगठन अनेरास्ववियु (क्रान्तिकारी)ले आव्हान गरेको शैक्षिक आमहड्तालका कारण धौलागिरीमा पठन पाठन प्रभावित भएको छ । हड्तालका कारण बागलुङ, पर्वत र म्याग्दी सदरमुकामका बिद्यालयहरुमा पठनपाठन प्रभावित भएको हो । तर ग्रामिण क्षेत्रका अधिकांश बिद्यालयहरुमा भने पठनपाठन निर्वाध रुपमा सञ्चालन भएका थिए । निश्चित क्षेत्र तोकेर हड्ताल आव्हान गरेको हुँदा थप समस्या सिर्जना हुन सक्ने आशंकामा विद्यालयहरुले बिहानी तथा दिवा कक्षा सञ्चालन गरेनन् । बागलुङ सदरमुकामको सिद्धार्थ शिक्षा सदनमा पनि पढाइएको थियो । सीबीएसईको पाठ्यक्रम संचालन गरिरहेका देशभित्रका मोर्डन इण्डियन स्कूल लगायत दर्जन भन्दा बढी शैक्षिक संस्थालाई शिक्षा मन्त्रायले दिएको स्वीकृति खारेज, मेडिकल कलेजहरुमा भइरहेको दलालीकरणको अन्त्य, विदेशी सम्बन्धन लिएका कलेजहरुको पूँजी र प्रतिभाव पलायन जस्तो राष्ट्रघाती हर्कत रोक्न माग गरिएको छ । त्यसैगरि, सीटीईभीटीले प्राविधिक शिक्षा अध्ययन गर्न विद्यार्थीलाई बञ्चित तथा चर्को शुल्क लिने कदमको अन्त्य, निजी कलेज तथा विद्यालयले गरेको चर्को शुल्क वृद्धिको खारेजी, शैक्षिक कन्सल्टेन्सीहरुले गरिरहेको भर्ती केन्द्र र दलाली तत्काल बन्द गर्नुपर्ने माग सहित शैक्षिक आम हड्तालको आव्हान गरिएको अखिल क्रान्तिकारले जनाएको छ ।