बागलुङ बजारमा दिन प्रतिदिन सवारी साधनको चाप बढ्दै गएको छ । गाउँ गाउँमा सडक संजाल पुग्नु, यातायात व्यवसायीबीच चर्काे प्रतिष्पर्धा बढ्दै जाँदा बागलुङ बजारमा सवारी साधनको चाप निकै बढ्दै गएको छ । जति सवारी साधन बढ्दै गएका छन् त्यो अनुरुप सडकको विस्तार हुन सकेको छैन । बागलुङ बजारका सडकहरु निकै नै साँघुरा छन् । जसको कारण सवारी साधनको चापले पैदल यात्रुलाई समेत आवतजावत समस्या हुँदै गएको छ । अर्काेतर्फ नगरपालिकाले बजारलाई व्यवस्थित बनाउन नसक्दा सडकपेटीमा राखिने बिक्रीजन्य वस्तुले पनि पैदल यात्रुसंगै सवारी साधनलाई असहज भएको छ । बागलुङ बजारका व्यापारीहरुमा सडकपेटीमा समान राख्न हुँदैन भन्ने सामान्य ज्ञानको समेत कमी हुँदा बजार कुरुप त बनेकै छ पैदलयात्रु र सवारी साधनलाई पनि आवतजावतमा समस्या हुने गरेको छ ।
नगरपालिका र ट्राफिक प्रहरीले बजारमा बढ्दै गएको सवारी चाप र त्यसलाई व्यवस्थापन गर्नको लागि समय समयमा नयाँ नयाँ कार्यक्रम संचालन पनि गर्दै आएको छ । तर, ट्राफिक र नगरपालिकाको कार्यक्रममा सवारी चालक, व्यापारी र पैदल यात्रुले साथ नदिँदा ति निष्प्रभावी बनिरहेका छन् । बजारका चोकहरु र होटलहरु अहिले सवारी साधनका टिकट काउन्टरमा परिणत भएका छन् । ट्राफिकले बजारको सवारी व्यवस्थालाई चुस्त बनाउनको लागि ठाउँ ठाउँमा ट्राफिक संकेतको व्यवस्था गरेपनि सवारी चालकले भने त्यसलाई मजाक बनाईरहेका छन् । एकतर्फी सवारी साधन चलाउनु पर्ने ठाउँमा दोहोरो सवारी चलाईरहेका छन् भने मोटरसाइकललाई मात्रै खुल्ला गरिएका साँघुरा सडकमा सवारी चालकले जर्बजस्ती गाडी गुडाईरहेका छन् । ट्राफिक र नगरपालिकाले त ट्राफिक व्यवस्थापनको लागि बाटो मात्रै देखाउने हो त्यसलाई कार्यान्वयन गर्ने दायित्व सवारी चालक र आमनागरिकको पनि हो । पैदल यात्रुहरुको सडक हिड्ने मनपरीतन्त्रले पनि सडकमा जाम हुनुका साथै दुर्घटनाहरु निम्त्याईरहेको छ।
जिल्ला ट्राफिक कार्यालय बागलुङले पछिल्लो समय सदरमुकाम भित्रको ट्राफिक व्यवस्थापनको लागि साङ्गलो अभियान संचालन गरेको छ । ट्राफिक प्रहरीले सडकमा जथाभावि पार्किङ्ग गरेर सडक साँधुरो बनाउने तथा आवात जावतमा समस्या सिर्जना गर्ने सवारीलाई ठाउँको ठाउँ साङ्गलो लगाएर नियन्त्रण अभियान संचालन गर्न बाध्य भएको हो । ठाउँको ठाउँ कार्वाही गर्दा समेत सवारी धनी र चालकले बेवास्ता गरेभने हदैसम्मको कार्वाही गर्न जरुरी छ । सवारी चालक, पैदल यात्रुले पनि सडकमा कहाँ हिड्ने बारे सोच्न जरुरी छ । र, सडकपेटीमा सामान राख्ने व्यापारीलाई पनि अन द स्पट कार्वाही गर्नुपर्छ । व्यापारीका कारण पनि अहिले बागलुङ बजारको ट्राफिक व्यवस्था कुरुप बन्दै गएको छ । सुन्दर नगरको लागि ट्राफिक व्यवस्था पनि एउटा सूचक हो । यसलाई पुरा गर्न हामी सबै नागरिकले आफ्नो ठाउँबाट सक्दो भूमिका खेल्नु पर्छ ।
