छक्कापञ्जाले ५१ औं दिन पार गर्यो

बागलुङ, १४ कात्तिक – १३ करोड रुपैयाँ बढीको व्यापार गरेर नेपाली फिल्ममा सर्वाधिक कमाइको रेकर्ड कायम गरेको फिल्म ‘छक्का पञ्जा’ ले शनिबार प्रदर्शनको ५१ औं दिन पार गरेको छ । कुनै बेला सफलताको सूचक मानिने प्रदर्शनीको ५१ औं दिन पछिल्लो समय मल्टिप्लेक्स कल्चरमा हराउँदै गएको थियो । धेरै हलमा एकसाथ रिलिज गरेर दुई सातामै नतिजा निस्कने गथ्र्यो । तर ‘छक्का पञ्जा’ ले भने देशभरका २४ मल्टिप्लेक्स हलमा ५१ दिने कोसेढुंगा पार गरेर फेरि अर्को रेकर्ड बनाएको छ ।
शनिबार फिल्म युनिटले पशुपतिनाथमा पूजाआजा गरी सफलताको उत्सव मनाएको छ । त्यसो त फिल्मका अभिनेतासमेत रहेका दीपकराज गिरीले पाशुपत परिसरमै बसेर ‘छक्का पञ्जा’ को स्क्रिप्ट खाका तयार पारेका थिए । पछि यसलाई अभिमन्यु निरबी, जितु नेपाल र केदार घिमिरेसहितको टिमले रंगरोगन गर्ने काम गरेको थियो ।
सबेरै पूजापाठपछि फिल्मकी निर्देशक दीपाश्री निरौला आफ्ना कलाकार टिम प्रियंका कार्की, दीपकराज गिरी, वसुन्धरा भुसालले बाजागाजासहित नगर परिक्रमा गरेका थिए । टोली मिनी टाटामा चढेर ५१ दिन पार गर्न सफल भएका राजधानीका हलहलमा पुगेको थियो ।
दीपकराज गिरी, शिवहरि पौडेल, केदार घिमिरे, जितु नेपाल, बुद्धि तामाङ, प्रियंका कार्की, वर्षा राउत, नम्रता सापकोटा लगायतको अभिनय रहेको फिल्मले प्रदर्शनको सुरुवातदेखि नै उच्च व्यापार गर्दै आएको छ । वैदेशिक रोजगारीले समाजमा पारेका प्रभावलाई हास्य रसमा घोलेर कथा वाचन गरेको ‘छक्का पञ्जा’ लाई दर्शकको बलियो वर्ड अफ माउथ मिलेको थियो । निर्देशक निरौलाले सफलताको सबै जस दर्शक, शुभचिन्तक र सञ्चारकर्मीलाई दिन चाहेको बताएकी छन् ।
दीपकले भने व्यापारिक सफलताभन्दा पनि अत्यधिक दर्शक कमाइ गर्न सक्नु आफूहरूका लागि सुखद रहेको टिप्पणी गरेका छन् । ‘छक्का पञ्जा’ ले रिलिजदेखि नै हिन्दी फिल्मलाई समेत विस्थापित गरी हलमा एकछत्र व्यापार गरेको थियो । उक्त फिल्मले मोफसल र राजधानी दुवैमा सर्वाधिक कमाइको रेकर्डसमेत राखेको हो । यसअघि उक्त रेकर्ड फिल्म ‘कोहिनूर’ का नाममा रहेको थियो ।