पत्नीको ज्यान जोगाउनेलाई धम्की

भारत, १३ कात्तिक-मान्छेको ज्यान बचाउनेलाई भगवानको दर्जा दिइन्छ । मान्छेको मात्रै होइन, जुनसुकै प्राणीको समेत ज्यान बचाउनुलाई महाधर्मको रूपमा समेत लिइन्छ पूर्वीय समाजमा । तर भारतमा एक पतिले आत्महत्या गर्न लागेकी आफ्नी पत्निलाई जोगाईदिने रक्षकहरूलाई उल्टै धम्की पो दिए ।
अहमदाबाद फायर एण्ड इमर्जेन्सीमा काम गर्ने कर्मचारीहरूले सावरमती रिभरफ्रन्टमा डुबीरहेकी एक महिलालाई डुब्नबाट जोगाएका थिए । पत्निको ज्यान जोगिएपछि अवस्थामा त्यहाँ पुगेका ती कर्मचारीहरूलाई ती पतिले किन मेरो श्रीमतीलाई जोगाएको भन्दै कर्मचारीहरूको तस्वीर समेत खिचेको ‘टाइम्स अफ इण्डिया’ले उल्लेख गरेको छ ।
फायरम्यान भरतले बताए, ‘कसको इजाजतमा तिमीहरूले यसको ज्यान बचाएको भन्दै ती व्यक्तिले हामीलाई उल्टै धम्क्याए । पछि हामीलाई यो बदमासलाई प्रहरीकोमा बुझाइदिनुपर्छ भन्ने समेत लाग्यो ।’ ३७ वर्षीय ती महिला ज्यान फाल्नकै लागि नदीमा हाम फालेकी थिइन् र फायरम्यानले ती महिलालाई बचाइसकेपछि उनको पतिलाई जानकारी दिइएको थियो । उनका पति पेट्रोल पम्पका मालिक समेत हुन् ।
ज्यान बचाएकोमा धन्यवाद दिनुको साटो लोग्नेले ‘मेरो स्वास्नीलाई किन मर्नबाट जोगाएको ?’ भनेपछि त्यहाँ भएका धेरै मान्छेहरू अचम्भित भएका थिए । पछि उनीहरूलाई प्रहरी कार्यालयमा पु¥याइयो र त्यहाँ सबै कुरा मिलाएर पति–पत्नी घर लागे । उनीहरूबीच एकअर्काको विवाह ऐत्तर सम्बन्ध भएको शंकामा विगत दशवर्षदेखि नियमित झगडा हुँदै आइरहेको बताइन्छ ।