सरकारी कार्यालयबाट सेवा चुस्त होस

बागलुङ, ९ कात्तिक – सरकारी कार्यालयबाट प्रदान गरिने सेवा सुविधाहरु चुस्त र नागरिकप्रति जवाफदेही हुनुपर्ने बागलुङको अर्जेवाबासीले माग गरेका छन् । जिविसको आयोजना र दिपज्योती युवा क्लबको सहजीकरण तथा अर्जेवा गाविसको व्यवस्थापनमा भएको सार्वजनिक सुनुवाइ कार्यक्रममा सहभागिले नागरिकले सहज रुपमा सरकारी सेवा पाउन नसकेको गुनासो गरेका हुन् । सरकारी काम गर्न सदरमुकाम र सेवा केन्द्र जाँदा ढीला सुस्ती भएको, एकै दिनमा हुने कामलाइ भोली आउन भनेको लगायतको गुनासो पनि गरेका थिए । अर्जेवा गाविसलाई लक्षित गरिएको सार्वजनिक सुनुवाईमा सहभागीले स्थानियस्तरमा भएको विकास निर्माण, स्वास्थ्य,शिक्षा,कृषि लगाएका बिषयमा जिज्ञाशा राखेका थिए । कार्यक्रममा उठेका जिज्ञासा तथा प्रश्नको जवाफ दिंदै जिल्ला विकास समितिका योजना तथा प्रशासकिय अधिकृत ईश्वरलाल शाक्यले सुशासन पारदर्शी बनाउन सरकारी निकाय प्रतिबद्ध रहेको बताए । उनले त्यस्ता गुनासालाइ कुन कार्यालय विशेषमा भएको हो तोकेरै उजुरी गर्न आग्रह पनि गरेका थिए । कार्यक्रममा जिल्ला शिक्षा कार्यालयका स्रोत व्यक्त प्रेमप्रसाद पौडेल,जिल्ला कृषि विकास कार्यालयका अर्जुन श्रेष्ठ,गाविस सचिव कलादेवी शर्माले आ आफनो कार्यालयले प्रदान गर्ने सेवालाई प्रभावकारी बनाउन आफुहरु कटिबद्ध भएर लाग्ने प्रतिबद्धता व्यक्त गरेका थिए । सार्वजनिक पदधारणा गरेका व्यक्तिहरुबाट सर्वसाधारण नागरिकले पाउने सुविधालाई कसरी प्रदान गरिएको छ भन्नेबारे सबैलाई जानकारी दिने उदेश्यले सार्वजनिक सुनुवाई कार्यक्रम संचालन गरिएको दिपज्योति यूवा क्लवका कार्यकारी निर्देशक तेजप्रसाद शर्माले बताए । गाविस सचिव कलादेवी शर्माको अध्यक्षता सामाजिक परिचालक सुविक्षा थापाको स्वागत र जिविसका नासु टेकवहादुर आरसीको संचालनमा कार्यक्रम सम्पन्न भएको थियो ।