भूत पूर्व सैनिक सहकारीद्वारा विपन्न विद्यार्थीहरुलाई छात्रवृति प्रदान

बेनी बजारको भूतपूर्व सैनिक बचत तथा ऋण सहकारी संस्था लिमिटेडले आफ्नो तेह्रौ बार्षिक साधारण सभाको अवसरमा ४ जना विद्यार्थीहरुलाई छात्रवृति वितरण गरेको छ ।
म्याग्दी बहुमुखी क्याम्पसमा अध्ययनरत बरंजाका शारिरिक अपाङ्ग सोमप्रसाद सापकोटा, मौवाफाटँका अभिभावक गुमाएका विशेष केसी र अमर मावि पाखापानीमा अध्ययनरत आविष्कार पाईजा र नेहा पाईजालाई ७ हजार पाँच सय रुपैयाँ दरले छात्रवृति प्रदान गरिएको सहकारीका अध्यक्ष बालकृष्ण सुवेदीले बताए ।
एक हजार भन्दा धेरै शेयर सदस्य रहेको भूपू सैनिक बचत तथा ऋण सहकारीको १ करोड ७ लाख ४२ हजार नौ सय रुपैयाँ शेयर पुँजी रहेको छ । गत आर्थिक वर्षमा १५ करोड १० लाख २० हजार ६५ रुपैया कारोवार,
गरेको सहकारीले जगेडा कोषमा ४६ लाख ४० हजार ३१ रुपैया राखेको छ । त्यस्तै गत आवमा १२ करोड ८० लाख ६५ हजार पाँच सय ७४ रुपैया निक्षेप संकलन गरेको छ भने ११ करोड ३५ लाख १५ हजार १० रुपैयाँ सहकारीले ऋण लगानी गरेको जनाएको छ ।
साधारण सभाको अवसरमा आर्थिक बर्ष २०७४/७५ मा सहकारीमा उत्कृष्ट बचत कर्ता हरिप्रसाद पाईजा पुन, र उत्कृष्ट ऋणी नङबहादुर थापालाई सम्मान गरिएको थियो ।
जिल्ला सहकारी संघ म्याग्दीका अध्यक्ष प्रेमबहादुर कार्कीले मुलुकको आर्थिक विकासमा सहकारी भूमिका महत्वपुर्ण भएको बताउदै सहकारीको लगानी कृषि, पशुपालन लगायतको उत्पादनमुलक क्षेत्रमा बढाउनुपर्नेमा जोड दिएका थिए ।
बेनी नगरपालिकाका प्रवक्ता रामकृष्ण बराईली र प्रशासकिय प्रमुख छविलाल सुवेदी सहकारीका पुर्व अध्यक्ष एवम् सल्लाकार नन्दबहादुर छन्त्यालले शुभकामना मन्तव्य राखेका थिए ।
साधारण सभामा सचिव गणेश श्रेष्ठको सञ्चालन, कोषाध्यक्ष हिराप्रसाद श्रेष्ठको आर्थिक र लेखा समिति सदस्य नारायणप्रसाद सुवेदीको लेखा तथा सुपरीवेक्षण प्रतिवदेन प्रस्तुत गरेका थिए । सहकारी संस्थाका अध्यक्ष बालकृष्ण सुवेदीको अध्यक्षता, उपाध्यक्ष झलकप्रसाद गौचनको स्वागत तथा सचिव गणेश श्रेष्ठको सञ्चालनमा कार्यक्रम सम्पन्न भएको थियो ।