-प्रताप बानियाँ
विगत केही दिनयता देशैभर चिसो बढ्दै गएपछि जनजीवन प्रभावित भएको छ । मौसममा आएको फेरबदलका कारण घाम नलाग्दा चिसो बढ्न गएको हो । चिसो ह्वात्तै बढेका कारणले गर्दा सर्वसाधारणको दैनिक जीवनयापनमा समस्या उत्पन्न भएको छ ।
दिउँसोको समयको तुलनामा भन्दा बिहान र बेलुका बढी चिसो बढेपछि सर्वसाधारणले आगो बालेर तापेका छन् । म्याग्दी र कालीगण्डकी नदीको सङ्गमस्थलमा रहेको म्याग्दीको सदरमुकाम बेनीबजारमा पनि क्रमशः चिसो बढ्दै जान थालेको छ । चिसो बढ्दै गएपछि बेनीबजारका स्थानीयले सडकको गल्ली र चोकचोकमा आगो बालेर ताप्दै आइरहेका छन् । अत्यधिक चिसो बढेको हुँदा सरकारी कार्यालयमा कार्यरत कर्मचारीलाई पनि काममा सास्ती भएको छ ।
बिहान अबेर मात्रै घाम आउने र छिटै अस्ताउने हुँदा चिसो बढ्ने हुँदा हिउँदको समयमा मानिसलाई सास्ती हुने गरेको छ । याहु वेदरका अनुसार दिनमा बेनीको तापक्रम अधिकतम ८ डिग्री र रातमा माइनस २ डिग्रीसम्म झर्ने गरेको देखिएको छ । उता हिमालपारीको जिल्ला मुस्ताङस्थित सदरमुकाम जोमसोमको तापक्रम पनि शुक्रबार दिउँसो माइनस १३ डिग्रीसम्म झरेको जिल्ला प्रहरी कार्यालय मुस्ताङका प्रहरी सहायक निरीक्षक शम्भु पौडेलले टेलिफोनमा जानकारी दिए । लोमान्थाङमा पनि तापक्रम घटेर माइनस १७ डिग्रीसम्म पुग्ने गरेको अन्नपूर्ण संरक्षण क्षेत्र आयोजना (एक्याप) कार्यालय लोमान्थाङले जनाएको छ ।
चिसो बढेका कारण काम गर्न समस्या भएपछि आगो ताप्नुपर्ने अवस्था आएको बेनी नगरपालिका कार्यालयका सहायक महिला विकास निरीक्षक लक्ष्मी केसीले बताइन् । हिमालपारीको जिल्ला मुस्ताङमा अत्यधिक रुपमा बढेको चिसोका कारण त्यहाँका मानिसहरुको दैनिकी निकै कष्टकर बन्ने गरेको छ । मुस्ताङका माथिल्ला डाँडाकाँडाहरुमा हिमपात समेत भएको छ । चिसो बढेसँगै स्थानीयहरु घरबाहिर निस्कन सकेका छैनन् । समुन्द्री सतहबाट ३ हजार ८५० मिटरको उचाइमा अवस्थित लोमान्थाङमा केही दिनयता चिसो ह्वात्तै बढेको छ । चिसोका कारण मुस्ताङको लोमान्थाङमा धाराको पानी जमेर खानेपानी नआएको इलाका प्रहरी कार्यालय लोमान्थाङका इन्चार्ज नरेन्द्रकुमार पौडेलले टेलिफोनमार्फत जानकारी दिएका छन् ।
लोमान्थाङमा उत्तरी तिब्बतबाट निकै चिसो हावा बहने हुँदा साँझ, बिहान र घाम नलाग्दाको समयमा समस्या हुने गरेको इन्चार्ज पौडेलले बताए । चिसो बढेपछि त्यहाँका स्थानीयहरु घरभित्रै आगो बालेर बस्न बाध्य छन् । यसैबीच चिसो छल्न भन्दै उपल्लो मुस्ताङका स्थानीयबासिन्दाहरु भने यसअघि नै बेंसीतिर झरिसकेका छन् । अहिले उपल्लो मुस्ताङीका घरमा घरकुरुवा, गोठाला र बुढाबुढी मात्रै बसेका छन् । चिसोबाट जोगिनका लागि स्वास्थ्यकर्मीहरुको न्यानो कपडा लगाउन, तात्तातो झोलिलो पदार्थ पिउन र आगो तापेर घरमै बस्नुपर्ने भनाइ छ ।
