विप्लव नेतृत्वको नेपाल कम्युनिष्ट पार्टी (नेकपा)का प्रवक्ता खड्क बहादुर विश्वकर्मा ‘प्रकाण्ड’ले स्थानीय तहले चर्को कर उठाएको बताएका छन् । उनले स्थानीय जनप्रतिनिधिले चर्को कर लिएर भ्रष्ट्राचार गरेकाले जनसरकार बनाएर जनप्रतिनिधिसँग क्रान्तिकारी कर उठाउने बताए ।
बुधबार कालिकोटमा भएको आमसभालाई सम्बोधन गर्दै प्रकाण्डले जनप्रतिनिधिसँग क्रान्तिकारी कर उठाउने बताएका हुन् । कायैक्रममा उनले भने, ‘स्थानीय सरकार बनेपछि समृद्धि आउछ भनेर आश गरेका थिए, तर जनतालाई कर थुपारेर भ्रष्ट्राचार गर्ने बाटो मात्रै भयो ।’
‘सरकारको काम जनतालाई सेवा दिने हो’, प्रकाण्डले भने, ‘अहिलेका जनप्रतिनिधि भ्रष्ट्राचारी भए, यिनीहरुलाई जनसरकार बनाएर क्रान्तिकारी कर लगाउँछौं ।’
नेपालमा कम्युनिष्ट नामधारी सरकारले राम्रो काम गर्न नसकेको प्रकाण्डले बताए । ‘हत्या, हिंसा, बलात्कार बढ्यो, त्यसमा सरकारकै संग्लनता छ ।’ उनले भने, ‘कन्चनपुरकी निर्मला पन्तको बलात्कारपछि हत्या गरिएको घटनाका दोषी पत्ता लगाउन सकेन् । अब, आफै थाहा पाउनु अपराधी को होलान् ?’
सरकारले विकासको कामभन्दा धर्म प्रचारमा लागेको प्रकाण्डले आरोप लगाए । ओली सरकारले जनताको काम गर्न छाडेर अहिले धर्म प्रचार गर्न लागेको उनले आरोप लगाएका छन् ।
