१३ लाखको खानेपानी आयोजनाबाट ४२ घरधुरी लाभान्वित

साजन परियार
पर्वत, २७ असोज – पर्वतको कुश्मा नगरपालिका– १२ चुवामा खानेपानीको अभाव टार्न तमादीखोला खानेपानी आयोजना निर्माण कार्य सम्पन्न भएको छ । एक घर–एक धाराको अवधारणा अनुसार निर्मित उक्त आयोजनाको नेपाली काँग्रेसका पूर्व केन्द्रिय सदस्य तथा पर्वत क्षेत्र नम्वर १ का सांसद अर्जुनप्रसाद जोशीले उद्घाटन गरे ।
मनाङ ट्रेड लिङक हाइड्रोपावर सरोकार समन्वय समितिको ६ लाख ५० हजार, जिल्ला सरसफाई तथा खानेपानी डिभिजन कार्यालय पर्वतको २ लाख ५० हजार र स्थानिय जने श्रमदान ४ लाख गरि कुल १३ लाख लागतमा सम्पन्न भएको उक्त खानेपानी आयोजनावाट ४२ घरधुरी लाभान्वित भएका छन् ।
आयोजनाको उद्घाटन गदै साँसद जोशीले विकास निर्माणका सवालमा एक भएर अगडी बढ्न जोड दिए । जोशीले विचारमा अनेकता भएपनि विकास निर्माणमा एक हुन सबैलाई आग्रह गरे ।
जोशीले सबै नेपालीले अपनत्व र स्वमित्व महसुस गर्ने गरी जारी संविधानलाई कार्यान्वयन गर्नुपर्नेमा जोड दिए । उनले ९० प्रतिशत भन्दा बढी जनताका प्रतिनिधीको समर्थनमा बनेको संविधानलाई नमान्ने, जलाउने र संविधानमा कमा र फुलस्टप पनि सच्चाउन हुन्न भन्ने दुईथरि अतिवादवाट जोगाउनुपर्ने कुरामा जोड दिए ।
नेपाली काँग्रेस गाउँ कार्य समितिका सचिव राजुप्रसाद सुवेदीको सभापतित्वमा सम्पन्न कार्यक्रममा नेपाली काँग्रेसका महाधिवेशन प्रतिनिधी विद्धान गुरुङ, नेपाली काँग्रेस जिल्ला कार्यसमिति सदस्य सरस्वती शर्मा जिज्ञासु, नेपाली काँग्रेस चुवाका पूर्व पाटी सभापति राजकुमार क्षेत्री, पूर्व वाणिज्य बैंकका कार्यकारी अधिकृत कृष्णप्रसाद सुवेदी, स्रोत व्यक्ति सुभन्तनाथ सुवेदी, जिल्ला कारागार पर्वतका प्रमुख नेत्रप्रसाद पौडेल, तमादी तथा चिसाखोला खानेपानीका अध्यक्ष शोभा पौडेल जिसी लगायतले वोलेका थिए ।
उक्त कार्यक्रममा खानेपानी आयोजना निर्माणका क्रममा महत्वपूर्ण भूमिका खेलेको भन्दै राजकुमार क्षेत्री, ललित क्षेत्री,शालिग्राम केसी र अमरवहादुर जिसीलाई सम्मान गरिएको थियो । मंगलदय प्राविका पूर्व प्रधानध्यापक रामवहादुर क्षेत्रीको स्वागत मन्तव्यमा सम्पन्न भएको कार्यक्रमको सञ्चालन नेपाली काँग्रेसका चुवाका पूर्व सचिव अर्जुन क्षेत्रीले गरेका थिए ।