निजीबन दर्ता गर्न जिल्ला बनको आग्रह

बागलुङ, १४ जेठ– जिल्ला वन कार्यालय बागलुङले आईतबार वनसँग सम्बन्धित पक्षहरुसँग अन्तरक्रिया कार्यक्रम सम्पन्न गरेको छ । वन तथा वातावरण संरक्षणसँग सरोकार राख्ने पक्षहरुसँग अन्तरक्रियात्मक कार्यक्रम सम्पन्न गरेको जिल्ला वन अधिकृत विशाल घिमिरेले बताए । कार्यक्रममा सहभागीले सामुदायिक बनको उपयोगितामा सरकारले लगाएका कतिपय रोकका कारण समस्या भएको बताएका थिए । जिल्लाका कतिपय वन क्षेत्रमा बर्षौं पुराना रुखहरुका कारण नयाँ रुख हुर्कन नपाएको भन्दै उनीहरुले पुराना रुखको कटानी र नयाँ रुखको व्यवस्थापन गर्ने नीति सरकारले अवलम्वन गर्नुपर्ने बताए । जिल्लामा सामुदायिक वनको तुलनामा निजी वन क्षेत्र दर्ता नहुँदा वन पैदावारको प्रयोगमा कतिपय कानुनी जटिलताहरु आउने गरेको कार्यालयले जनाएको छ । सयौं हेक्टर क्षेत्रफलमा निजी वन रहेको भएपनि हालसम्म कार्यालयमा एउटा मात्रै निजी वन दर्ता भएको तथ्याङ्क छ । सामुदायिक वनलाई जस्तै निजी वनलाई पनि नेपाल सरकारले पैदावरको प्रयोगमा कर छुट लगायतका सुबिधा दिएको भएपनि सुचनाको अभावमा निजी वन दर्ता हुन नआएको सहायक बन अधिकृत उपेन्द्र अर्यालले बताए । निजी वन दर्ता गर्दा घाँस दाउरा तथा काठको बिक्री बितरणमा सहज हुने भएपनि उपभोक्ताहरुले वन दर्ता नगराएको उनको भनाई थियो । अन्तरक्रियामा सामुदायिक वनका प्रतिनिधि, काठ तथा फर्निचर व्यवसायसँग सम्बन्धित प्रतिनिधि सहभागी थिए ।