बागलुङ, १३ जेठ– वन तथा वन्यजन्तु संरक्षणका कार्यलाई प्रभावकारी ढंगबाट अघि बढाउनका लागि जिल्लामा रहेका सुरक्षा निकायको समन्वय बैठक बागलुङ बजारमा सम्पन्न भएको छ । बैठकले वन तथा वन्यजन्तु अपराध नियन्त्रण, प्रभावकारी संरक्षण तथा वन्यजन्तुहरुको आकस्मिक उद्वारको उद्देश्यले एक ¥यापिड रेस्पोन्स टिम गठन गरेको छ । टिममा सम्बन्धित वन तथा शिकार आरक्षको सुरक्षा निकाय रहने व्यवस्था गरिएको जिल्ला वन कार्यालय बागलुङले जनाएको छ ।
कार्यक्रममा जिल्ला प्रहरी कार्यालय बागलुङका प्रहरी उपरीक्षक दिपक रेग्मी, नेपाली सेना अर्जुनबाण गण बागलुङका गणपति भुवनराज देवकोटा, राष्ट्रिय अनुसन्धान विभाग जिल्ला कार्यालय बागलुङका प्रमुख विजय पौडेल, जिल्ला प्रशासन कार्यालय बागलुङका प्रशासकिय अधिकृत धीरेन्द्रराज पन्तको सहभागिता रहेको थियो । बैठकमा जिल्ला वन अधिकृत विशाल घिमिरे, वन तथा वन्यजन्तु संरक्षण तथा ढोरपाटन शिकार आरक्ष कार्यालयका प्रमुख संरक्षण अधिकृत अणनाथ बरालले साइटिस तथा वन्यजन्तु अपराध नियन्त्रण ब्युरो सम्बन्धी प्रस्तुती दिएका थिए ।
बैठकलाई सम्बोधन गर्दै प्रमुख जिल्ला अधिकारी वेदप्रसाद खरेलले वन तथा वन्यजन्तु संरक्षणका लागि जिल्लामा रहेका सम्पूर्ण निकायलाई प्रभावकारी ढंगबाट परिचालन गर्न र समन्वयात्मक ढंगबाट अघि बढ्नको लागि निर्देशन दिएका छन् । जिल्ला वन कार्यालय तथा ढोरपाटन शिकार आरक्ष कार्यालयको संयुक्त आयोजनामा भएको बैठक प्रमुख जिल्ला अधिकारी वेद प्रसाद खरेलको अध्यक्षतामा सम्पन्न भएको थियो ।
