नारायण गौतम
बागलुङ, ५ जेठ– श्री विश्वशान्ति सर्वसिद्धिधाम पञ्चकोट बा.न.पा. ६ बागलुङमा गण्डकी माता मन्दिर निर्माण गर्ने दानबिर पुष्पमान श्रेष्ठलाई स्वागत गरिएको छ ।
पञ्चकोटमा गण्डकी माता मन्दिर निर्माण गर्न ५४ लाख ६२ हजार रुपैयाँ आर्थिक सहयोग गर्ने बा.न.पा. ३ हाल काठमाडौं निवासी पुष्पमान श्रेष्ठ र उनकि धर्मपत्नी लालु श्रेष्ठलाई एक कार्यक्रमका बिच स्वागत तथा सम्मान गरिएको हो । धार्मिक तथा पर्यटकीय गन्तव्यस्थलका रुपमा बिकास भएको पञ्चकोटमा निर्माण भएको सो मन्दिर पश्चिमाञ्चलकै अलौकिक शैलीमा निर्माण भएको मन्दिर हो ।
स्वागत तथा सम्मान कार्यक्रममा बोल्दै श्रेष्ठले पञ्चकोटले धार्मिक तथा पर्यटकीय क्षेत्रमा आफ्नो छुट्टै पहिचान बनाएको भन्दै थप प्रचार प्रसारमा जोड दिनुपर्ने बताए । गण्डकी माताको मन्दिर निर्माण गरेका श्रेष्ठले गण्डकी माताको मन्दिर, शिष महल, गरुडशिला तथा गणेश मन्दिर परिसरमा मार्बल बिच्छाउनुका साथै अन्य भौतिक संरचनाहरुका लागि आफुले सक्दो सहयोग गर्ने प्रतिबद्धता जनाएका छन् । कार्यक्रम श्री विश्वशान्ति सर्वसिद्धिधाम पञ्चकोटका महासचिब माधब प्रसाद उपाध्यायको स्वागत मन्तव्य, निबर्तमान प्रतिनिधि अध्यक्ष नगेन्द्रराज शर्माको अध्यक्षता एवं सचिब नारायण प्रसाद आचार्यको सञ्चालनमा सम्पन्न भएको थियो ।
कार्यक्रममा गत फागुन ९ गतेदेखि १५ गतेसम्म संचालित पञ्चकोट महायज्ञको आय–व्यय यहि जेठ ८ गतेका दिन सार्बजनिक गरिने तयारी गरिएको पञ्चकोट मूल समितिले जानकारी गराएको थियो ।
दानदाता पुष्पमान श्रेष्ठलाई पञ्चकोटमा स्वागत
