म्याग्देली कलाकार शर्माको हे बरै ….

म्याग्दी, १९ असोज – म्याग्देली कलाकार दिपक शर्माले गायन र अभिनयमा डेब्यु गरेका छन् । शर्माको शब्द, संगीत र लय भएको लोक पप शैलीको हे बरै …. बोलको गीत सोमबार सार्वजनिक भएको हो ।
हाईलाईट्स नेपालमार्फत सार्वजनिक भएको शर्माको आवाज रहेको गीतमा उनकै अभिनय देख्न सकिन्छ । युट्युबमा सार्वजनिक भएको १२ घण्टामा साढे चार हजार जनाले गीत हेरेका छन् ।
सो गीतको म्यूजिक भिडियोमा शर्माले हास्यटेलिश्रृंङखला भद्रगोलकी कलाकार रक्षा केसीसँग अभिनय गरेकी छन् । ‘गायन र अभिनयमा मेरो डेब्यु हो’ शर्माले भने । रोमान्टिक शैलीको यो गीतमा लोक भजन र कौराको समिश्रण पाईन्छ ।
अनिल मानन्धरले छायांकन र बसन्त सापकोटाले निर्देशन गरेको भिडियोको टेकेन्द्र साहले सम्पादन गरेका छन् । अभिनयमा शर्माले मन पराएकी रक्षालाई पट्याउन सफल भएको देख्न सकिन्छ । अहिलेको चर्चीत चलचित्र छक्का पञ्जाको समेत संगितकार रहेका कुहुँ-५ पैयुपाटामा जन्मिएका ३१ वर्षिय शर्मा एक दशक भन्दा लामो समयदेखि सांगितीक क्षेत्रमा क्रियाशिल हुनुहुन्छ ।
वि.स. २०६० सालदेखि सांगीतिक क्षेत्रमा प्रवेश गरेका शर्माले संगीतको माध्यमबाट आफू र जिल्लाको नामलाई राष्ट्रिय अन्तर्राष्ट्रिय स्तरसम्म चिनाउन सफल भएका हुन् । काठमाडौंको ललितकला क्याम्पसबाट संगितमा प्रविणता प्रमाणपत्र तह उत्तिर्ण गरेका शर्माले भारतको ईलहावाद विश्व विद्यालयमा संगीतमै पाँच वर्षे कोर्ष गर्दै छन् ।