बागलुङ, १० असोज – इलाका वन कार्यालय बुर्तिवाङमा कार्यरत रेन्जर अनिलकुमार महतोले सदरमुकाम देखि कार्यक्षेत्र जाँदा ११ घण्टाको जोखिमपूर्ण यात्रा गर्नुप¥यो । कहिले झर्ने, कहिले यात्रीहरु मिलेर गाडी धकेल्ने गर्दा सबै जना हिलाम्मे समेत भए ।
बिहान ७ बजे हिडेका यात्री बेलुकी ६ बजे मात्र पुग्दा बुंगादोभान, बोहोरागाउँ र निसी हिडेका यात्रीले बुर्तिवाङमै रात बिताउन बाध्य भए । सदरमुकामको काम लिएर आएकाहरुले आउन र जान गरी ४ दिन बिताउन बाध्य भएका छन् । सदरमुकामको सामान्य काम भएपनि ५ हजार भन्दा कम पैसाले जाउ आउ नपुग्ने उनले बताए । कार्यालयको कामका लागि जाउ आउ गर्दा समेत सास्ती खेप्नुपर्ने उनले गुनासो गरे ।
असार लागेदेखि राष्ट्रिय गौरवको आयोजना भनिने मध्य पहाडी लोकमार्गको खण्डमा यात्रीले यस्तै सास्ती खेपेका छन् । साउनमा आएको बाढी पहिरोले धेरै ठाउँ भत्केकोले दुइ साता सम्म पैदल यात्रा समेत रोकिएको थियो । बल्ल बल्ल खुलेको सडकमा जीप र बस चलेपनि जोखिमको यात्रा बन्ने गरेको हो । सदरमुकाम देखि अक्षेते खण्डमा सडक पूरै जीर्ण भएपछि यात्रीले आधा घण्टाको बाटोलाइ दुइ घण्टा लगाउन बाध्य छन् । त्यस्तै खरवाङ देखि बुर्तिवाङ तर्फ पनि पूरै जीर्ण भएको हो । घोडाबाँधे देखि हटिया सम्म भने साँघुरो भएपनि कालोपत्रे भएकोले सामान्य अवरोध बाहेक समस्या छैन ।
उत्तर दक्षिण जोड्ने गरी निर्माणाधिन कालीगण्डकी कोरिडोरको बागलुङ खण्डमा पनि असार देखि सवारी चल्न छाडेका छन् । दर्जनौ स्थानमा पहिरो खसेको छ भने कतै हिलाम्मे छ । बलेवा तर्फको सम्म स्थानमा हिलाम्मे सडक छ भने मालढुंगा देखि नारायणस्थान तर्फ पहरो खसेको छ । ‘राष्ट्रिय गौरवको आयोजना भएपनि सवारी चलेको छैन’ नारायणस्थानका धु्रव परियारले भने, ‘पर्वत सदरमुकाम भएर मात्र आउजाउ गर्न सकिन्छ ।’ सवारी नचलेको कोरिडोरको खण्डमा पैदल हिड्दा पनि ज्यानकै जोखिम मोल्नुपर्ने उनले बताए ।
जिल्ला सदरमुकाम देखि कुश्मीसेरा, ताराखोला, सिगाना लगायत स्थानमा जानका लागि पनि सडकमा यात्रीले सास्ती खेप्नुपर्छ । करोडौं खर्चेका सडकमा सयौं यात्रीले सास्ती खेप्दा पनि जिविस तथा आयोजनाले भने चासो देखाएको छैन । मध्य पहाडी र कोरिडोरको जिम्मा आयोजनाहरुले लिएकोले जिविसले चासो नराखेको हो । तर आयोजनाले पनि बर्षातमा वास्ता नगरेपछि यात्रीले सास्ती खेपेका हुन् । बर्षात लागेपछि बानपा ४ र ५ तर्फको लोकमार्गको खण्डमा बाटो भत्काएपछि हिलाम्मे भएर सवारी चल्नै छाडेका थिए । मर्मत तथा सवारी संचालन गर्नका लागि पहल नभएपछि धेरैले पैदलै यात्रा गर्न बाध्य समेत थिए । जीर्ण सडककै कारण पटक पटक सवारी दुर्घटनामा पनि परेका छन् ।
जिविसले मर्मत गर्नुपर्ने ग्रामीण सडकमा समेत सवारी चल्न नसकेपछि चाडपर्वका लागि स्थानीयलाइ खाद्यान्न लैजाने चिन्ताले सताएको छ । ‘आउजाउ गर्नै मुस्किल छ, कसरी खाद्यान्न र अन्य सामान ल्याउने चिन्ता लागेको छ’ दमेककी राधिका सापकोटाले गुनासो गरिन् । सदरमुकाम जाने काम भएर पनि सडकको अवस्था देखेर जान नसकेको उनले बताइन् । राष्ट्रिय राजमार्ग भएपनि मर्मत समेत नभएपछि आएको गुनासोलाइ आयोजनामा पु¥याउने स्थानीय विकास अधिकारी भरत गौतमले बताए । उनले दशै अघि सरासर सवारी चल्ने बनाउन आग्रह गरेको जानकारी दिए ।
