मानस राजको गीत ‘भाइरल भइदियो…’

काठमाडौं, ९ मंसिर – हिजोआज ‘भाइरल’ शब्द चल्तीमा छ । यही शब्द समातेर मानस राजले निकालेको गीत ‘भाइरल भइदियो…’ भाइरल नै त भएको छैन तर चर्चा ठूलो छ । युटयुब नेपालको ट्ेरन्डिङमा झन्डै एक साता यो गीत पहिलो नम्बरमा पर्‍यो । अझै पनि टप १० भित्र यसलाई देखिन्छ । भ्युज २६ लाख ७० हजार नाघिसकेको छ भने कमेन्टस् करिब पाँच हजार छन् ।
मानसका लागि यो लोकप्रियता नौलो होइन । भाइरल हुँदाको अनुभव उनले यसअघि पनि बटुलिसेका थिए । तर, त्यो बेला गीतकारका रूपमा भाइरल भएकाले उनलाई असली मज्जा चाहिँ गायक बनेपछि नै आएको छ ।
‘पर्दापछाडि काम गर्नुको दुर्भाग्य यही त हो,’ उनले भने, ‘तर, यसलाई अन्यथा लिनुभएन । संसारकै नियम यस्तो छ । अगाडि हुने चिनिन्छ, पछाडिका मान्छे छायामा पर्छन् ।’
मानसले कालीप्रसाद बाँस्कोटासँग लेखेको गीत ‘पारि त्यो डाँडामा…’ बारे यहाँ कुरा हुँदै छ । यो गीत त्यतिबिघ्न हिट हुँदा पनि मानसको नाम खासै नोटिस भएन । यद्यपि उनले आफ्नो गीति लेखनलाई अगाडि बढाइरहे । कतिपय फिल्म र सिंगल ट्रयाकका लागि संगीत रचे । तर, गायन बाँकी रहयो ।
‘सही समय आएपछि गाउँछु भन्ने सोच थियो,’ मानस बोल्छन्, ‘त्यो समय अहिले नै हो भन्ने लाग्यो ।’ संगीत र संगीत क्षेत्रको अनुभव बटुलेपछि मानसले आफ्नो वास्तविक परिचय दिएका छन् । उनी खासमा गायक नै हुन् । ६ वर्षअघि पहिलो गीत ‘अरू केही…’ बजारमा ल्याएका थिए । त्यसमा उनकै शब्द, संगीत र स्वर थियो । त्यो बेला उनी चन्दन श्रेष्ठ र सुदेशराज शर्मासँग भोकल क्लास लिन्थे । गायक मोहन भुसालले गितार बजाउन सिकाइदिएपछि उनी कम्पोजिसनमा पनि अग्रसर भए ।
मानसका शब्द र संगीतमा मोहन भुसाल, सनुप पौडेल, हेमन्त राना, अल्मोडा राना उप्रेती लगायतले स्वर भरेका छन् । संगीतसँगै उनी अभिनयमा सक्रिय छन् । ‘अन्धो युग’, ‘सरकारी निरीक्षक’, ‘चरनदास चोर’, ‘सान्दाजुको महाभारत’ जस्ता नाटकमा उनले भूमिका निर्वाह गरे । शिल्पी थिएटरमा मञ्चन हुन लागेको ‘राप चिन्र्या भानु’ नाटकमा पनि उनलाई देख्न सकिनेछ ।
‘म्युजिक र थिएटरले एकअर्कालाई परिपूर्ण गरिरहेका छन्,’ उनले भने, ‘दुइटैमा कल्पनाशिलता चाहिन्छ । संगीतले अभिनय र अभिनयले संगीतलाई सघाएको महसुस गर्छु ।’
दुई साताअघि युटयुबमा अपलोड गरिएको ‘भाइरल भैदियो…’ गीतका लागि आफूहरूले निकै मिहिनेत गरेको मानसको भनाइ छ । उनका अनुसार शब्द/संगीत क्याची भएकाले यसलाई श्रोताले रुचाए । ‘भिडियो पनि त्यहीअनुसार छ,’ उनले सुनाए, ‘सविन कार्कीको कन्सेप्ट गीत सुहाउँदो बन्यो । सानी नानीले गर्दा भिडियो क्युट देखियो ।’ रोमान्टिक शैलीको यस गीतको भिडियो खिच्न मात्रै एघार दिन लगाएको मानसले बताए ।