गीत गाउँदागाउँदै ढलेका गायक खुसीराम पाख्रिनको निधन

चितवन, ५ मंसिर – माओवादी केन्द्रका पोलिटब्युरो सदस्य एवं गायक खुसीराम पाख्रिनको निधन भएको छ। पूर्वप्रधानमन्त्री एवं माओवादी केन्द्रका अध्यक्ष पुष्पकमल दाहाल ‘प्रचण्ड’ का पुत्र प्रकाश दाहालको श्रद्धाञ्जलीसभामा गीत गाउने क्रममा एक्कासी बेहोस भएर ढलेका पाख्रिनको नारायणी सामुदायिक अस्पतालमा उपचारका क्रममा मृत्यु भएको हो। शोक सभामा गीत गाउँदा गाउँदै ढलेका गायक पाख्रिनलाई उपचारका लागि नारायणी सामुदायिक अस्पतालमा भर्ना गरिएको थियो।
‘अस्पताल पु¥याउने बेलासम्म उहाँ अलिअलि बोल्दै हुनुहुन्थ्यो’, खुसीरामका भतिज युरिम पाख्रिनले भने, ‘त्यसको १५ मिनेपछाडि उहाँको हृदयको गति बन्द भयो।’ उनले गायक पाख्रिनमा सुगर र पेसरको सामान्य समस्या रहेपनि पछिल्लो समय त्यस्तो कुनै समस्या नदेखिएको बताए। ‘बिहान हामी एउटै गाडीमा सभास्थलसम्म गएका हौँ’, उनले भने, ‘उहाँमा त्यस्तो केही समस्या देखिएको थिएन। गायक पाख्रिनले शोकसभामा गीत गाइसकेपछि बमिट गरेको र त्यसपछि उहाँको स्वास्थ्यमा एक्कसी समस्या देखिएको उनले जनाकारी दिए।युरिमले भने, ‘डाक्टरले हामीलाई फाइनल कुरा भनिसक्यो, अब हामी उहाँको शव घर लैजाने तयारी गर्दैछौँ। उनले पाख्रिनको शवलाई भोलि अन्तिम श्रद्धाञ्जलीका लागि पार्टी कार्यालयमा राखिने र भोलि नै दाहसंस्कार गरिने जानकारी दिए।
शोक तथा चुनावी सभा जारी रहेका कारण अहिले अस्पतालमा पाख्रिनका आफन्त र केही मात्रामा माओवादी केन्द्रका कार्यकर्ताको मात्रै उपस्थिति रहेको अस्पतालामा रहेका हाम्रा सहयोगी हरि पौडेलले जानकारी दिए। उनका अनुसार अहिले पाख्रिनको शव आइसियुमै राखिएको र केही बेरमा बाहिर निकाल्ने तायरी भैरहेको छ।