सुशील पन्त
नयाँदिल्ली,१असोज-नेपाली प्रधानमन्त्रीको भारत भ्रमणमा धेरै भारतीय सञ्चार माध्यमहरूले उसको चासोलाई सम्बोधन गर्दै नेपालले संविधान संशोधन गरोस् र चीनसँगको निकट सम्बन्धलाई घटाओस् भन्ने आशयका खबर सम्प्रेषण गरेका छन् । भारतको ‘जागरण दैनिक’ले शीर्षक नै लेखेको छ –भारतमा चीनको दाल गल्दैन । समाचारको उपशिर्षक छ , ‘प्रधानमन्त्री मोदीसँगको वार्तामा चीनसँगको सम्बन्धको दुरी बढाउन प्रचण्ड सहमत ।’
सोही समाचारको एक ठाउँमा नेपालको सुरक्षा र रक्षासँग जोडिएको चासोलाई भारतले सम्बोभन गर्ने विषयमा समेत प्रचण्ड र मोदीबीच कुराकानी भएको उल्लेख छ । यसरी भारतका धेरैजसो मिडियाले प्रधानमन्त्री पुष्पकमल दाहाल प्रचण्डको भारत भ्रमणलाई महत्व दिएपनि उनीहरूको चासो एउटै छ , ‘नेपालले संविधान संशोधन गरोस् , चीनसँगको दुरी बढाओस् र भारतकै छत्रछायाँमा नेपाल बाँचोस् ।’
ती पत्रपत्रिकाहरूले नेपालका प्रधानमन्त्रीलाई भारत भ्रमणमा बोलाएर नेपाल–भारत सम्बन्धलाई सुधार गर्न खोजिएको आशयका विचार प्रवाहित गरेका छन् । उनीहरूको बुझाई छ, ‘केपी ओली सरकारले भारतसँगको सम्बन्ध बिगारेको थियो ।’
हिन्दुस्तान टाइम्सले प्रधानमन्त्रीको भ्रमणलाई प्राथमिकता दिएर लेखेको खबरमा पनि उही कुरो छ –नेपालले मधेशीहरुको भावनाको कदर गर्दै संविधान संशोधन गरोस् । उसको समाचार शीर्षक छ , ‘भारत प्रचण्डले संविधान संशोधन गराउनेमा आशावादी।’
‘द एशियन एज’को समाचार शीर्षक ‘मोदीले नेपाललाई सहयोग गर्ने विश्वास दिलाए’ भन्ने छ । त्यस्तै, ‘द हिन्दु’को ‘बिजनेश लाइन’ले मोदी र प्रचण्डको वार्तामा संविधान संशोधनको विषय हाबी भएको’ शीर्षक राखेर समाचार छापेको छ ।
