मनाङ, २४ असोज – सबैभन्दा कम मतदाता रहेको हिमाली जिल्ला मनाङमा कांग्रेस र एमालेले संघ र प्रदेश चुनावको लागि उम्मेदवारको टुंगो लगाएको छ । एउटा संघीय क्षेत्र र २ प्रदेश क्षेत्र रहेको मनाङमा यस पटक यी दुई पार्टीबीच तीव्र प्रतिष्पर्धा हुने देखिएको छ । कांग्रेसले संघको प्रत्यक्षतर्फ सांसद टेकबहादुर गुरुङलाई सिफारिस गरेको छ भने एमालेले संघको प्रत्यक्षतर्फ जिल्ला अध्यक्ष पोल्देन छोपाङ गुरुङलाई उम्मेदवारमा सिफारिस गरेको छ ।
कांग्रेसले प्रदेशको क्षेत्र नं. १ मा चिन्तबहादुर घलेलाई सिफारिस गरेको छ । त्यस्तै एमालेले प्रत्यक्षतर्फ धोर्जे ढन्डुल गुरुङलाई सिफारिस गरेको छ । यस्तै, कर्म गुरुङलाई प्रत्यक्षतर्फ कांग्रेसले प्रदेश क्षेत्र नं. २ मा सिफारिस गरेको छ । एमालेले राजीव गुरुङलाई सिफारिस गरेको छ । कांग्रेसका सांसद गुरुङ संविधान सभा निर्वाचन २०७० मा विजयी भएका थिए ।
समानुपातिकतर्फ कांग्रेसले संघमा कर्म घलेलाई सिफारिस गरेको छ । प्रदेश क्षेत्र नं. १ मा समानुपातिक तर्फ साङ्दो लामालाई सिफारिस गरेको छ । प्रदेश क्षेत्र नं. २ मा समानुपातिक तर्फ सागर गुरुङ (टाइगर) र महिलातर्फ छिरिङओङ्मा घले गुरुङलाई सिफारिस गरेको छ ।
एमालेले समानुपातिकतर्फ पासाङ विष्ट, याङ्डुुङ गुरुङ, मंगलबहादुर गरुङ, युटेन गुरुङ, नरेन्द्र घले, रत्नकुमारी गुरुङ र नन्द गुरुङको नाम सिफारिस गरेको एमाले जिल्ला सचिव लोकेन्द्र घलेले बताए । ४ वटा स्थानीय तह रहेको मनाङमा नेस्याङ र नारफू गाउँपालिका प्रदेश क्षेत्र नं. १ मा पर्छ । प्रदेश क्षेत्र नं. २ मा चामे र नासोङ गाउँपालिका पर्छ । मनाङमा करिव ६ हजार मतदाता छन् ।
