पुर्नसंरचनाप्रति बढ्दैछ असन्तुष्टि

पर्वत टुक्राएको भन्दै जिल्लाबसी आक्रोशित
बागलुङ, २८ भदौ
लामो समयदेखि सहमति जुट्न नसकी विवादित बन्दै आएको पर्वतको स्थानीय निकाय पुर्नसंरचना कार्य स्थानीय तह पुर्नसंरचना प्राविधिक सहयोग समितिले आइतबार मध्यरातमा टुंगो लगाएको छ ।
राजनीतिक दलहरुका प्रतिनिधिहरुको आ आफ्नै अडानका कारण निचोडमा पुग्न नसकेको पुर्नर्सरचना कार्य आइतबार मध्यरातमा टुंगिएको हो ।
आइतबार राती १ बजे स्थानीय तह पुर्नर्सरचना प्राविधिक सहयोग समितिका संयोजक एवं स्थानीय विकास अधिकारी युवराज पौडेलसहित विभिन्न राजनीतिक दलका प्रतिनिधिहरु कुश्मा बजारको होटल बेञ्जुमा बसेर टुंगोमा पु¥याएका हुन् ।
यता राजनीतिक दल सहितको टोली बसेर होटलबाट जिल्ला टुक्राएको भन्दै जिल्लाबासीहरु आक्रोशित बनेका छन् । प्राकृतिक सम्पदाहरुको कुनै ख्याल नै नगरी नगरपालिका र गाउँ पालिका बनाउने सहमति गरेको भन्दै जिल्लाबासी आक्रोशित बनेका हुन् ।
कार्कीनेटा गाविस लगायत खौला लाँकुरी, ठूलिपोखरी, आर्थर सहितका गाविसलाई जिल्लाको महत्वपूर्ण प्राकृतिक सम्पदाका रुपमा चिनिने पञ्चासे र डहरे क्षेत्रलाई आधार बनाएर गाउँ पालिका बनाउनुपर्ने माग गरेपनि आइतबार मध्यरातको सहमतिमा कुनै सुनुवाई नभएको कार्कीनेटा गाविसका पुर्व गाविस अध्यक्ष बाबुराम शर्माले जानकारी दिए ।
सो सँगै कालीगण्डकी नदी र आसपासका क्षेत्रलाई विभिन्न तबरबाट उपयोग गर्दै आएका लुंखु, पाखपानी लगायतका बासिन्दाहरु समेत दलहरुको सहमति प्रति आक्रोशित बनेका छन् । यस क्षेत्रका बासिन्दाहरुले प्राकृतिक स्रोतहरुको उचित व्यवस्थापनमा ध्यान नै नदिई गाउँ पालिका घोषणा गरेको भन्दै विरोध गरेका हुन् ।
बुधबार देखि चलेको निरन्तर छलफल र अन्तरक्रियाबाट समेत स्थानिय निकाय पुर्नसंरचना को टुंगो लगाउन नसकेपछि आइतबार राती १ बजे होटल बेञ्जुबाट सहमति जुटेको हो ।
सहमति अनुसार समितिले जिल्ला भर १ नगरपालिका र ६ गाउँपालिका आयोगमा पठाउने भएको छ । पर्वतका ५५ गाविस मध्ये ८ गाविस मिलेर बनेको कुश्मा नगरपालिकामा खौलालाँकुरी, आर्थर डाँडाखर्क र ठुलिपोखरी गाविसलाई थप गरी कुश्मा नगरपालिका कायम गर्ने प्रस्ताव गरेको छ ।
त्यस्तै नाग्लिवाङ केन्द्र रहने गरी बाँसखर्क, माझफाँट, लेखफाँट, शालिजा, धाइरिङ, बनौ गाविसको एउटा गाउँ पालिका प्रस्ताव गरेको छ भने क्याङ, बाजुङ, देउराली, भुकताङ्ले, देउपुर, तिलाहार, चित्रे, राम्जाठाँटीको अर्को गाउँपालिकाका रुपमा प्रस्ताव गरेको छ ।
त्यसै गरी कार्किनेटा, थापाठाना, शंकरपोखरी, मुडीकुवा, भंगरा, लिमिठाना, ठानामौला खानीगाउँ र देविस्थान गाविसलाई खानीगाउँ केन्द्र रहने गरी गाउँपालिका प्रस्ताव गरिएको छ ।
जिल्लाका दक्षिणी गाविस फलामखानी, लुंखु, पाखापानी, बालाकोट, भोकसिङ, होश्राङ्दी र कुर्घा गाविसलाई लुंखुदेउराली केन्द्र रहने गरी गाउँपालिका सिफारिस गरिएको छ भने हुवास गाविस केन्द्र रहने गरी टकलाक, त्रिवेणी, बेहुलीबास, सरौखोला र भोर्ले गाविसलाई पनि गाउँ पालिका सिफारिसका लागि प्रस्ताव गरिएको छ ।
त्यस्तै रानीपानी गाविस केन्द्र रहने गरी पाङराङ, बाच्छा, बर्राचौर, वहाकी , उराम र शालिग्राम गाविसलाई समेत गाउँ पालिका सिफारिस गरिएको छ ।