काठमाडौ, १७ असोज – नेकपा एमाले,नेकपा माओवादी केन्द्र र नयाँ शक्ति नेपालका वीचमा तत्काल चुनावी तालमेल गर्ने र मंसिरमा हुने प्रतिनिधिसभा र प्रदेश सभाको निर्वाचनपछि पार्टी एकता गर्ने घोषणा भएको छ । राष्ट्रिय सभागृहमा मंगलबार भएको संयुक्त पत्रकार सम्मेलनमा सार्वजनिक गरिएको चुनावी तालमेल र पार्टी एकता सम्बन्धी सहमति पत्रमा एमाले अध्यक्ष केपी शर्मा ओली,माओवादी केन्द्रका अध्यक्ष पुष्पकमल दाहाल प्रचण्ड र नयाँ शक्ति नेपालका अध्यक्ष बाबुराम भट्टराईले हस्ताक्षर गरेका छन् । सो सहमति पत्र गृहमन्त्री तथा नेकपा माओवादी केन्द्रका अध्यक्ष जनाद्र्धन शर्माले बाचन गरेका थिए ।
एउटै कम्युनिष्ट पार्टी निर्माण गर्न आठ सदस्यीय पार्टी एकता संयोजन समिति बनाइएको छ । सो समितिमा एमालेका चार, माओवादीका तीन र नयाँ शक्तिका एक जना नेता रहनेछन् । एमाले र माओवादीका अध्यक्ष प्रमुख नेता रहनेछन् ।
पार्टी एकताको बिस्तृत खाका संयोजन समितिले तयार पार्ने घोषण पनि पत्रकार सम्मेलनमा गरिएको छ । बैचारिक छलफल र बहसद्धारा क्रान्तिको सिद्धान्तलाई विकसित गर्दै लगिने पनि पत्रकार सम्मेलनमा घोषणा गरियो । तीन वटै पार्टी सम्मिलित चुनावी घोषणापत्र मस्यौदा समिति बनाउने पनि नेताहरुले घोषणा गरेका छन् । 
ओली र प्रचण्ड दुवैले चुनावी तालमेल र पार्टी एकताको घोषणा नेपाली काँग्रेस र अरु कसैका बिरुद्ध परिलक्षित नरहेको र राष्ट्रिय स्वाधिनता,आर्थिक समृद्धि र जनताको चाहना र भावना अनुसार भएको बताए । ओलीले भने ‘चुनावी तालमेल कसैका बिरुद्ध छैन,नेपाल र नेपाली जनताको पक्षमा छ । यो नेपालको आवश्यकता हो । यो नेपाली जनताको आँकाक्षा र चाहना हो ।’
‘यो चुनावी घोषणा र पार्टी एकता गर्ने पहल नेपाली जनताको आँकाक्षा हो र नेपालको आवश्यकता हो’ अध्यक्ष ओलीले भने ‘चुनावले सुपरिणाम दिन सकोस,देशलाई अगाडि बढाउने दिशामा निर्वाचन उपयोगी हुन सकोस,यसका निम्ति यो जरुरी थियो ।’
एमाले र माओवादीका वीचमा सोमबारसम्म सूर्य चुनाव चिन्हमा चुनाव लडने घोषणा गरेका थिए तर माओवादी नेताहरुको दबाब अन्य प्राविधिक र कानुनी कारणले त्यो संभव नभएको नेताहरुले बताए । ‘एउटै चुनाव चिन्ह लिएर चुनाव लडने सुन्नु भएको थियो होला । प्राविधिक र कानुनी कुराले त्यो संभव हुन सकेन । हामी एउटै पार्टी बनाउने भएपछि त्यसैदिशामा जान्छौ ।’
चुनावी तालमेल र पार्टी एकताबाट कुनै पार्टीले पनि केहि पनि नछोडेको ओलीले बताए । उनले भने ‘कसैले केहि छोडेको छैन । एमाले र माओवादी केन्द्र र नयाँ शक्ति नेपालले सहमति पत्रमा देशलाई सार्वभौमसत्ता,राष्ट्रिय एकता र स्वाभिमानलाई सुरक्षित र माथि उठाउन चाहन्छौ भनेका छौ । त्यसका निम्ति एकताबद्ध हुन आवश्यक छ ।’
‘भूगोल,जात,भाषा,समुदायका वीचमा द्धन्द भडकाउने प्रयास गरे,एक हदसम्म हामीले पराजित गरेका छौ ’ ओलीले भने ‘सामाजिक न्याय र सदभावमा आधारित भएर अगाडि बढेका छौ । हामी सबै जनताको वीचमा गरिवी,असमानता अन्त्य गर्नुपर्छ ।’
२०७४ मा देशभक्त बामपन्थी सरकार हुने ओलीले बताए । ‘साधारण बहुमत ठूलो कुरा होइन,हाम्रो ध्यान दुईतिहाइतिर छ’ उनले भने । आफूहरुले सन्तुलित र मैत्रीपूर्ण र बरावरीको हैसियतमा छिमेक सम्बन्ध चाहेको ओलीले बताए । ‘राष्ट्रसंघ वडा पत्र भन्दा एक अक्षर बाहिर जाँदैनौ । असंलग्न परराष्ट्र नीतिलाई पनि छोडदैनौ’ उनले भने ।
एकता प्रक्रियामा खुसीयाली र उत्साहकासाथ यस अभियानमा सरिक हुन ओलीले अपिल गरे । ‘एमाले,माओवादी केन्द्र र नयाँ शक्ति नेपालका नेता कार्यकर्तालाई खुसीयाली भावका साथ अगाडि बढन आब्हान गर्न चाहन्छु’ओलीले भने ‘यो अभियान शुरुवात हो । कम्यनिष्ट,प्रगतिशिल साथीहरुलाई आ आफनो ताउलो बसाउन छोडन अपिल गर्दछु । हामी ठूलो र सानो भन्दैनौ । हामी हिसावतिर लाग्दैनौ । भावना र उद्देश्यबाट हामी प्रेरित छौ ।’ एकता प्रक्रियामा सहभागी हुने अरु पार्टीलाई दिएर बाँकी रहेको एमालेले ६० र माओवादी केन्द्रले ४० प्रतिशत लिने नीति बनाइएको पनि ओलीले बताए ।
‘हरेक नेपालीको चेहरामा मुस्कान आउनुपर्छ । एकताबद्ध र शान्तिपूर्ण राष्ट्र हासिल गर्न पाउनुपर्छ । त्यहि चाहना हामी पूरा गर्न चाहन्छौ’ ओलीले भने ।
नेकपा माओवादी केन्द्रका अध्यक्ष पुष्पकमल दाहाल प्रचण्डले एमालेसँग चुनावी तालमेल गर्ने र पार्टी एकता गर्ने पहल काँग्रेस वा कसैका बिरुद्ध परिलक्षित नभएको स्पष्ट पारेका छन् । संयुक्त पत्रकार सम्मेलनमा प्रचण्डले भने ‘पार्टी एकता र चुनावी तालमेल कसैका बिरुद्ध परिलक्षित छैन । नेपाली जनता र राष्ट्रको पक्षमा छ । स्वाधिनता र समृद्धिको पक्षमा छ ।’
उनले भने ‘पार्टी एकता कम्युनिष्टहरुका वीचमा हुनेछ । लोकतान्त्रिक शक्तिहरुसँग पनि चुनावी तालमेल गरिनेछ ।’ मधेशकेन्द्रित दल वा अन्य लोकतान्त्रिक दलसँग तालमेल गर्ने नीति रहेको प्रचण्डले बताए ।
राजनीतिक स्थिरतासहित आर्थिक समृद्धिको दिशामा जान एकता प्रक्रिया अगाडि बढाउनु परेको प्रचण्डले बताए । ‘आर्थिक समृद्धि विना समाजवादको आधार संभव छैन’ उनले भने‘यो पहल २१ औ शताब्दीको मोडल खडा गर्ने,बिश्वलाई नयाँ सन्देश दिने भावनाद्धारा प्रेरित छ ।’
समाजवादको नयाँ मोडल खडा गरेर बिश्वलाई नयाँ सन्देश दिन सक्नु पर्नेमा जोड दिदै प्रचण्डले भने ‘आर्थिक,सामाजिक र राजनीतिक अवस्था अनुसार नयाँ मोडल दिनुछ बिश्वलाई । हामीले सक्नैपर्छ ।’
पार्टी एकताको लागि पहिले पनि छलफल भएको र केहि दस्तावेज तयार पारेर आवश्यक निर्णय लिने प्रयास गरेको प्रचण्डले बताए । जनयुद्ध र जनआन्दोलनका सहिदहरु र वेपत्ता योद्दाहरुलाई स्मरण र सम्मान व्यक्त गरे । ‘हाम्रो एकता ऐतिहासिक आवश्यकताद्धारा निर्देशित छ’ उनले भने । आवश्यकता र आकस्मिकताले एकता प्रक्रिया अगाडि बढेको उनले उल्लेख गरे । ‘राजनीति सभावनाहरुको खेल हो’उनले भने ।
तीन पार्टीको चुनावी तालमेल अहिले, एकता चुनावपछि
