सामाजिक कार्यमा २० लाखको कोष

पर्वत, २७ भदौ – मोफसलमा पत्रकारिता, सामाजिक अभियान्ता र मानवअधिकारको क्षेत्रमा काम गर्ने गरी पर्वतका एक व्यक्तिले २० लाख राशीको पुरस्कार कोष स्थापना गरेका छन् । नेपाल पत्रकार महासंघ पर्वतका संस्थापक अध्यक्ष अधिवक्ता भोलानाथ शर्माले नेपाल पत्रकार महासंघको संरक्षकत्वमा २० लाख राशिको कोष स्थापना गरेका हुन । शारिरीक अपाङ्गता रहेका शर्माले आफ्नो ४५ औं जन्मदिनको अवसरमा भोला फाउण्डेसनको स्थापनाका लागि २० रुपैयाँ रकमको चेक नेपाल पत्रकार महासंघ पर्वतका अध्यक्ष दुर्गाप्रसाद शर्मालाई हस्तान्तरण गरेका हुन । उक्त रकमको ब्याजबाट हरेक बर्ष राष्ट्रियस्तरमा पत्रकारिता, मानबअधिकार र सामाजिक न्यायको क्षेत्रमा काम गर्ने ब्यक्तिलाई १ लाख रुपैंयाँ नगद सहित सम्मानित र पुरस्कृत गरिने छभने प्रदेश नं ४ बाट एक जना पत्रकारलाई २५ हजार नगद सहित सम्मानित र पुरस्कृत गरिने छ । मोफसलमा पनि राष्ट्रियस्तरको पुरस्कार स्थापना गर्ने उद्देश्य सहित फाउन्डेसनको स्थापना गरिएको शर्माले बताए । ‘मैले बिशुद्ध सामाजिक, सञ्चार र मानवअधिकारको क्षेत्रमा काम गर्ने राष्ट्रिय ब्यक्तित्वलाई सम्मान मिलोस् भनेर मोफसलमै सबैभन्दा ठुलो राशीको पुरस्कार स्थापना गरेको हुँ’ उनले भने– ‘यसले राष्ट्रिय ब्यक्तित्वलाई जिल्लासम्म आकर्षित गर्ने बिश्वास लिएको छु’ । अविवाहित शर्माले आफ्नो भावनात्मक सन्तानको रुपमा फाउण्डेसनलाई जन्म दिएको बताए । ‘यो मेरो भावनाको सन्तान हो’ उनले भने– ‘यसलाई त्यसरी नै हुर्काउने बढाउने काम गरिनेछ ।’ फाउन्डेसनमा अहिले २० लाख भएपनि पछि आफुँ र परिवारका तर्फबाट पनि रकम थप गर्दै लैजाने योजना छ उनले भने । नेपाल पत्रकार महासंघ पर्वतका अध्यक्ष दुर्गाप्रसाद शर्माले पत्रकारिता, सामाजिक न्याय र मानवअधिकारको क्षेत्रमा क्रियाशिल अग्रजबाट स्थापना भएको फाउण्डेसनलाई संस्थागत रुपमा लैजाने प्रतिबद्धता ब्यक्त गरे । कार्यक्रममा नेपाल उद्योग बाणिज्य महासंघका केन्द्रिय सदस्य होमनारायण श्रेष्ठ, नेपाल पत्रकार महासंघ पर्वतका पुर्ब अध्यक्ष ओमप्रसाद घायल, पर्वत बार इकाईका निर्वतमान अध्यक्ष दिलीपरज शर्मा लगायतले शुभकामना दिदै शर्माले उदाहरणीय र प्रशंसनीय कामको थालनी गरेकोमा बधाई दिएका थिए । फाउन्डेसनलाई संस्थागत रुपमा दर्ता गर्नका लागि ५ सदस्यीय बिधान मस्यौदा समिति बनाइएको छ । मस्यौदा समितिले ३ महिनाभित्र फाउण्डेशनका लागि विधान तयार पारिसक्ने बताइएको छ । फाउन्डेसनमा पत्रकार, न्याय र सामाजिक क्षेत्रमा काम गरेका ब्यक्तिहरु सञ्चालक र सदस्य बन्ने छन् भने शर्माको परिवार संरक्षक बस्ने भएको छ ।