‘सहकारी ऐनमा ७५ प्रतिशत राम्रा र २५ प्रतिशत सुधार्ने कुरा’

बागलुङ, १२ असोज – राष्ट्रिय सहकारी बैंकका प्रवन्ध सञ्चालक के.बी. उप्रेतीले राज्यले बनाउने नीति नियम अनुसार सहकारी संघ संस्थाहरु सञ्चालन गर्न सहकारीकमीहरुलाई आव्हान गरेका छन । जिल्ला सहकारी संघ बागलुङले बिहीवार आयोजना गरेको शुभकामना आदान प्रदान तथा सहकारी ऐन सम्बन्धी अन्तरक्रिया कार्यक्रममा बोल्दै उनले यस्तो वताएका हुन ।
कुनै पनि नीति नियम बनाउनु भन्दा पूर्व सल्लाह, सुझाव र दवाव दिए पनि पारित भैसकेपछि त्यसलाई कार्यान्वयन गर्नुको विकल्प नभएको उनको भनाइ थियो । संसदबाट पारित सहकारी ऐनमा ७५ प्रतिशत राम्रा कुरा रहेको र २५ प्रतिशत अझै सुधार गर्नु पर्ने विषय रहेको जानकारी गराउदै सकारात्मक विषयलाई पूर्ण रुपमा कार्यान्वयन गर्दै सुधार गर्नु पर्ने विषयमा संशोधनका लागि पहलकदमी गरिरहनु पर्नेमा जोड दिए ।
सहकारी क्षेत्रको विकासका लागि प्रवद्र्धन कोष, कर्जा सूचना केन्द्र, कर्जा असुली न्यायाधीकरण, कालो सूचीको व्यवस्था, प्रतिनिधिमुलक साधारणसभा, कर समायोजन लगायतका विषय सकारात्मक रहेको उनको भनाइ थियो । कार्यक्रममा राष्ट्रिय सहकारी बैंकका सञ्चालक रामबहादुर जिसीले ऐनको बारेमा जानकारी गराउदै उत्पादन तथा सेवा क्षेत्रका सहकारीहरुलाई थप गति दिनका लागि ऐन सहयोगी हुने धारणा राखे ।
कार्यक्रममा ढोरपाटन दैनिकका सम्पादक हरिनारायण गौतम, बहुउद्देश्यीय सहकारी संघ बागलुङका अध्यक्ष अञ्जु जिसी, वचत तथा ऋण सहकारी संघ बागलुङका सचिव ऋषिराम गौतम, वचत तथा ऋण सहकारी संघ काठमाडौंका सञ्चालक तारानाथ सापकोटा लगायत विभिन्न सहकारी संघ संस्थाका अध्यक्ष तथा प्रतिनिधिहरुले शुभकामना व्यक्त गरेका थिए । कार्यक्रम जिल्ला सहकारी संघ बागलुङका अध्यक्ष दिपक गौतमको अध्यक्षता, उपाध्यक्ष अशोकगोविन्द राजभण्डारीको स्वागत र सचिव युक्तप्रसाद कंडेलको सञ्चालनमा सम्पन्न भएको थियो ।