काठमाडौं, २६ भदौ- मन्त्रिपरिषद आइतबारको बैठकले राष्ट्रिय योजना आयोगको रिक्त सदस्यमा तीन जनालाई नियुक्त गरेको छ। बैठकले डा.स्वर्णीम बाग्ले, प्रभु वुढाथोकी र प्रा.भिरेन्द्रमान प्रधानलाई नियुक्त गरेको हो। आइतबारको नियुक्तिसँगै आयोगले पूर्णता पाएको छ। सरकारले यसअघि डा.मीनबहादुर श्रेष्ठलाई आयोग उपाध्यक्षमा नियुक्त गरेको थियो।
अाइतबार नियुक्त सदस्यमध्ये मध्ये डा.वाग्ले दोस्रो पटक आयोग सदस्यमा नियुक्त भएका हुन्। यसअघिको प्रा.डा.गोविन्द पोखरेल उपाध्यक्ष रहँदा उनले भूकम्पपछि ‘विपतपछिको आवश्यकता आँकलन (पिडिएनए)’ प्रतिवेदन तयार पार्ने कार्यको नेतृत्व गरेका थिए। त्यही प्रतिवेदनलाई आधार मानेर भूकम्पपछिको पुनःनिर्माणका लागि विदेशी दाताहरुले करिब ५ खर्ब रुपैयाँभन्दा बढीको सयहोगको प्रतिबद्धता जनाएका थिए।
दोस्रो कार्यकालको आफ्नो योजनाबारे आइतबार साँझ डा.वाग्लेले भने, ‘आयोगमा दुई किसिमले काम हुन्छन् एउटा नियमित काम र अर्को नयाँ काम। नियमित कामलाई प्रभावकारी बनाउन र केही नयाँ काम गर्ने लक्ष्य सहित म आएको छु।’
दोस्रो कार्यकालका लागि उनले संक्षिप्त कार्य योजना सुनाए। ‘आयोगले अहिले दीर्घकालीन योजना बनाउन सकिरहेको छैन। १०, १५ वा २० वर्षपछि कहाँ पुग्ने भन्ने लक्ष्य छैन। त्यसैले दीर्घकालीन विकासको रणनीति तय गर्ने काममा मेरो विशेष पहल र चासो रहनेछ’, उनले भने।अायोगमा पहिलो कार्यकालका नियुक्त हुनुअघि उनी विश्व बैंककाे बरिष्ठ अर्थशास्त्रीको रुपमा वासिङ्टन डिसीमा कार्यरत थिए। उनी संयुक्त राष्ट्रसंघीय विकास कार्यक्रम (युएनडिपी) ले सन् २०१३ प्रकाशित गरेको ‘द राइज अफ साउथ: ह्युमन प्रोग्रेस इन अ डाइभर्स वर्ल्ड’का सहलेखक हुन्। अष्ट्रेलियन नेशनल युनिभर्सिटीबाट विद्यावारिधी गरेका उनले अमेरिकाको हार्बर्ड र वेलायतको लन्डन स्कूल अफ इकोनोमिक्सबाट डिग्री हाँसिल गरेका छन्।
१२ सचिवको सरुवा
यस्तै बैठकले १२ सचिवको सरुवा गरेको छ। सहकारी तथा गरीवी निवारण मन्त्रालयका सचिव शंकर प्रसाद अधिकारीलाई सरकारले संस्कृति पर्याटन तथा नागरिक उड्ययन मन्त्रालयमा सरुवा गरेको छ।
पश्चिमाञ्चल क्षेत्रिय प्रशासक गोपिनाथ मैनालीलाई निर्वाचन आयोगमा ल्याइएको छ। निर्वाचन आयोगका सचिव शारदा प्रसाद त्रिताल सहकारी तथा गरीबी निवारण मन्त्रालयमा सरुवा भएका छन्। आपूर्ति सचिव श्रीधर सापकोटा रक्षा, युवा तथा खेलकूद मन्त्रालयका सचिव लक्ष्मी प्रसाद मैनाली श्रम तथा रोजगार मन्त्रालय, महिला बालबालिका तथा समाजकल्याण मन्त्रालयका सचिव मधु रेग्मीलाई लोकसेवा आयोगमा सरुवा भएका छन्।
श्रम तथा रोजगार मन्त्रालयका सचिव विष्णु लम्साललाई महिला, बालबालिका तथा समाजकल्याण मन्त्रालय, भौतिक पूर्वाधार तथा यातायातका सचिव अर्जुन कुमार कार्की नेपाल ट्रस्टको कार्यालय, सचिव महेश कुमार दाहाललाई युवा तथा खेलकूद मन्त्रालय, जल तथा उर्जा आयोगका सचिव धनबहादुर तामाङलाई भौतिक, नेपाल ट्रष्टका सचिव भिम उपाध्यायलाई जल तथा ऊर्जा आयोग र पर्यटन सचिव प्रेम कुमार राई आपूर्ति मन्त्रालयमा सरुवा भएका छन्।
राष्ट्रिय भवन निर्माण आचारसंहितालाई राजपत्रमा प्रकाशित गरेर देशभर लागु गर्ने समेत निर्णय गरेको छ। यस अघि ५८ नागरपालिकामा लागु भएको आचारसंहिता सबै नगरपालिका र १ हजार भन्दा बढी घरधुरी भएका गाविसहरुमा लागु गर्ने निर्णय सरकारले गरेको हो। यस्तै विद्युत प्राधिकरणका कार्यकारी निर्देशक मुकेशराज काफ्लेको राजीनामा स्विकृत भएको छ।
