जडीबुटी निकासीबाट राजस्व वृद्धि

बागलुङ, १७ भाद्र – जिल्लामा आर्थिक वर्ष २०७२/०७३ माभन्दा २०७३÷०७४ मा जडिबुटी निकासीबाट राजश्वमा वृद्धि भएको छ ।
जिल्ला वन कार्यालय बागलुङको तथ्याङ्गक अनुसार, आर्थिक वर्ष ०७२/७३ मा भन्दा ०७३÷७४ मा जडिबुटीबाट १ लाख ४७ हजार ३ सय ९० रुपैयाँ बढि राजश्व संकलन भएको छ ।
आर्थिक वर्ष २०७२/७३ मा साधारण च्याउ, चिराइतो, चुल्ठे अमिलो, पदमचाल, बन लसुन लगायत ११ प्रजातिका ११ हजार ८ सय ७५ केजी जडिबुटी विक्रीबाट १ लाख २८ हजार ३ सय ३५ रुपैयाँ राजश्व संकलन भएकोमा आ.व. ०७३/०७४ मा सतुवा, बन लसुन, साधारण च्याउ, लोक्ता, धुपीको पात, कुरिलो लगायतका २० प्रजातिका २० हजार ४ सय ९० केजी जडिबुटीबाट २ लाख ७५ हजार ७ सय २५ रुपैयाँ राजश्व संकलन भएको जिल्ला वन कार्यालयका सहायक वन अधिकृत रामबहादुर विकले जानकारी दिए ।
बागलुङका सामुदायिक वनहरु प्राकृतिक रुपमा पनि जडिबुटीको राम्रो सम्भावना भएकाले राजश्वमा वृद्धि भएको सहायक वन अधिकृत विकले बताए । पछिल्लो समयमा जिल्लामा उत्पादित जडिबुटीहरु कम मात्रामा पाउने गरिएको र यसको संरक्ष्ण गरि उत्पादनमा अझै वृद्धि गर्न सकिने सहायक वन अधिकृत विकले बताए ।
प्राकृतिक रुपमा जडिबुटीको राम्रो सम्भावना भएपनि हालसम्म जिल्लामा जडिबुटी संकलनको मात्र कार्य गर्ने कोही नभएको वन कार्यालयले जनाएको छ । ‘बागलुङ जडिबुटीको प्रशस्त सम्भावना भएको जिल्ला हो’ –सहायक वन अधिकृत विकले भने– ‘जडिबुटीको उत्पादनमा कृषकहरु लाग्न सकेमा जिल्लाको गरिवी विपन्न परिवारको आर्थिक स्तर वृद्धि हुन सक्दछ ।’