काठमाडौं, ५ भदौ-सरकारले प्रधानमन्त्री शेरबहादुर देउवाको भारत भ्रमणलाई अनुमोदन गरेको छ । प्रधानमन्त्री तथा मन्त्रिपरिषद् कार्यालय सिंहदरबारमा आज बसेको मन्त्रिपरिषद्को बैठकले प्रधानमन्त्री देउवाको आसन्न भारत भ्रमणलाई स्वीकृत गरेको सूचना तथा सञ्चार मन्त्री मोहनबहादुर बस्नेतले जानकारी दिए ।
उनका अनुसार भ्रमणमा तराई डुबाउने कोशी र लक्ष्मणपुर बाँधबारे भारतीय पक्षसँग छलफल कुरा उठाउने निर्णय भएको छ । ‘लक्ष्मणपुर बाँध, कोशी बाँध र त्यसबाट भएको नोक्सानीका बारेमा छलफल गर्ने निर्णय भएको छ,’ सञ्चारमन्त्रीले भने– ‘भूकम्पपछि पुनःनिर्माण प्राधिकरणलाई आर्थिक सहयोग गर्ने भनी भारतले गरेको प्रतिबद्धता र पुराना सन्धि सम्झौताबारे पनि कुरा हुन्छ ।’
कोशी बाँध बगाउँदा स्थानीय जनतालाई भारत सरकारले दिने भनेको रु ५० करोड अहिलेसम्म नदिएको हुँदा त्यसबारे समेत भ्रमणमा छलफल हुनेछ । पञ्चेश्वर जलविद्युत् आयोजना, वाणिज्य व्यापार, सन् १९५० को सन्धि, नेपाल–भारत रेल्वेलगायतका बारेमा पनि भ्रमणमा छलफल हुने बताइएको छ ।
साथै देउवा नेतृत्वको प्रतिनिधिमण्डलले कोशी, लक्ष्मणपुर लगायतका बाँधबाट भएका क्षति र नोक्सानीबारे भारतीय पक्षसँग छलफल गर्ने कार्ययोजना समेत बनेको छ ।
