बागलुङ, २३ भदौ – बागलुङको वलेवामा पहिलो पटक नारायणस्थान सहलगानी लिफ्ट खानेपानी तथा सरसफाई आयोजना सुरु भएको छ । सो आयोजनाको शिलान्यास ब्यवस्थापिका संसदका सदस्य प्रकाश पौडेलले विहिवार एक कार्यक्रमका विच गरे । शिलान्यास गर्दै सांसद पौडेलले जिल्लामा नै पहिलो पटक लिफ्ट सिस्टमबाट निर्माण हुन लागेको खानेपानी योजनालाई सफल पार्नका लागि स्थानियको निकै महत्वपूर्ण दायित्व हुने र हरेक बिकास निर्माणका कार्यलाई सफल बनाउन समाज र समुदायको उत्तिकै भुमिका हुने बताए ।
सिलन्यास कार्यक्रममा बोल्दै सांसद पौडेलले राज्यको पुर्नसंरचना गर्दा जनताको चाहना अनुसार जानुपर्ने बताए । अहिले जिल्लामा पुर्नसंरचनाको खाका पठाउँदा मनपरी तरिकाले निर्णय गरेर जनताको चाहना विपरितको काम भएको बताए । जिल्लाको विषयमा छलफल गर्दा जिल्लाका राजनैतिक दल र पुर्नसंरचना प्राविधिक समितिले आफुहरुलाई कुनै थाहा नदिएको गुनासो गरे । स्थानीय तहको पुर्नसंरचनाको काम सकिदाँ साथ आगामी चैत्र मसान्तभित्र स्थानिय तहको निर्वाचन हुने उनको भनाई थियो ।
बलेवा नारायणस्थान खानेपानी आयोजना सहलगानीको अवधारणामा कुल लागतको ७० प्रतिशत नेपाल सरकार, २० प्रतिशत जनश्रमदान र १० प्रतिशत उपभोक्ताको लगानीमा सम्पन्न गर्न लागिएको हो । कुल १० करोड ६२ लाख ९१ हजार २ सय ७० रुपैया ५४ पैसाको शुरुको लागत रहेको योजनामा ठेक्का प्रक्रियाबाट कुल १० करोड ५५ लाख ७७ हजार ८ सय १ मा सम्पन्न गर्न निर्माण कम्पनी बसन्त यन्ड चन्द कन्सट्रक्सन प्राली ललितपुरले जिम्मा लिएकोे खानेपानी तथा सरसफाई डिभिजन कार्यालय बागलुङका डिभिजन प्रमुख पुर्ण प्रसाद उपाध्यायले बताए ।
कालिगण्डकीको किनार नजिकैको मुहानबाट २ स्थानमा विद्युतिय पम्प जडान गरी २ दशमलब ६ किलोमिटरको उचाईमा रहेको ट्यांकीमा पानी जम्मा गरी बितरण गरिने छ । योजना सम्पन्न पश्चात १ हजार ५ सय २५ घरदुरीका करिब पाँच हजार जनता प्रत्यक्ष रुपमा लाभाम्बित हुने आयोजनाका अध्यक्ष चक्र बहादुर खत्रीले बताए । योजनामा ३० हजार २ सय २ किलोमिटर पाईपलाइर्न वितरण गरिने छ । १ हजार २५ धाराहरु रहनेछन । यो आयोजनाबाट नारायणस्थान गाविसका १ देखी ९ वटै वडा र पैयुँपाटा गाविसका ८ र ९ वडाका वासिन्दा लाभान्वित हुनेछन ।
२०७४ मंसिर सम्ममा निर्माण सम्पन्न गर्ने उद्देश्य लिएको उक्त खानेपानी योजनामा पानी परिक्षण प्रयोगशाला, कार्यालय भवनसँगै २० वटा भल्भ च्याम्बर निर्माण गरिनेछ कार्यक्रममा खानेपानी तथा ढल विकास बिभाग सहलगानी आयोजनाका उपप्रमुख प्रदिपलाल कर्ण, खानेपानी तथा सरसफाई डिभिजन कार्यालय बागलुङका डिभिजन प्रमुख पुर्णप्रसाद उपाध्याय, निर्माण कम्पन्नी बसन्त एण्ड चन्द कन्सट्रन प्रालीका ईन्जीनियर राजीव सुवेदी, लगायतले तोकिएको समय भन्दा अगाडि नै योजना सम्पन्न गर्ने उद्देश्य रहेको बताए । बलेवा नारायणस्थान सहलगानी खानेपानी तथा सरसफाई आयोजनाका अध्यक्ष चक्र बहादुर खत्रीको अध्यक्षतामा समपन्न भएको कार्यक्रमको सञ्चालन सचिव भरत पौडेलले र स्वागत उपाध्यक्ष टिका बहादुर खत्रीले गरेका थिए ।
