जिसस बागलुङमा बाम–राप्रपा गठबन्धन बिजयी

बागलुङ २१ साउन
जिल्ला समन्वय समिति बागलुङको शुक्रवार भएको निर्वाचनमा बाम राप्रपा गठबन्धन बिजयी भएको छ ।
स्थानीय तह निर्वाचनको अन्तिम निर्वाचन अन्र्तगत शुक्रवार जिल्ला समन्य समिति गठन भएको हो । समितिको संयोजकमा गठबन्धनका तर्फबाट राष्ट्रिय जनमोर्चाका केन्द्रीय सदस्य तथा प्रदेश नम्बर ४ का ईन्चार्ज समेत रहेका राजेन्द्र ढुंगाना बिजयी भएका हुन् । जिल्लाका १० स्थानीय तहका प्रमुख र उपप्रमुख तथा अध्यक्ष र उपाध्यक्ष गरी २० मतदाता रहने व्यवस्था अनुसार खसेको मतमा ढुंगानाले १२ मत पाएका थिए । बाम राप्रपा गठबन्धनको प्रतिद्वन्दी कांग्रेसका लक्ष्मण आचार्यले ८ मत पाएका थिए ।
सहसंयोजकमा एमालेका बिष्णु भूषाल निर्वाचित भएका छन् । सदस्यमा एमालेका राजु केसी र रुपा विक, राजमोका ताराकुमारी पुन, माओवादी केन्द्रका झंकबहादुर कामी, दलबहादुर थापा र फूलकुमारी पुन र राप्रपाका डिल्ली आचार्य बिजयी भए । गत बैसाख ३१ गते भएको निर्वाचनमा बागलुङ नगरपालिकामा बाम राप्रपा गठबन्धन, ढोरपाटन नगरपालिकामा एमालेका प्रमुख र उपप्रमुख बिजयी भएका थिए । गलकोट नगरपालिका, तमानखोला गाउँपालिका र निसी खोला गाउँ पाालिकामा कांग्रेसको एकल प्यान, जैमिनी नगरपालिकामा प्रमुखमा कांग्रेस र उपप्रमुखमा बाम गठबन्धनबाट एमाले बिजयी भएको थियो । बरेङ गाउँपालिकामा राष्ट्रिय जनमोर्चाको एकल प्यानल, ताराखोला गाउँपालिकामा माओवादी केन्द्रको एकल प्यानल बिजयी भएका थिए । त्यस्तै काठेखोलामा संयुक्त प्यानलबाट एमालेका अध्यक्ष र राजमोको उपाध्यक्ष, बडिगाढ गाउँपालिकामा गठबन्धनका अध्यक्ष र कांग्रेसका उपाध्यक्ष बिजयी भएका थिए । बरेङ गाउँपालिका १ धुल्लुवाँस्कोटबाट वडा सदस्यमा निर्वाचित भएका ढुंगाना केन्द्रीय तहमा पनि राजमोको प्रभावशाली नेताको रुपमा चिनिन्छन् । गत संविधानसभाको निर्वाचनमा बागलुङ निर्वाचन क्षेत्र नं. २ बाट कांग्रेसका प्रकाश पौडेल सँग पराजित भएका थिए ।
शुक्रवार आयोजित एक कार्यक्रममा जिल्ला न्यायाधिस तथा मुख्य निर्वाचन अधिकृत हिमलाल बेलवासेले ढुंगाना र भुषाललाई पद तथा गोपनीयताको सपथ ग्रहण गराएका थिए । त्यस्तै ढुंगानाले निर्वाचिन सदस्यहरुलाई पनि सोही अवसरमै पद तथा गोपनीयताको सपथ गराएका थिए । कार्यक्रमको उद्घाटन गर्दै उच्च अदालत बागलुङ इजलासका मुख्य न्यायाधिस जयबहादुर वागचनले कर्मचारीतन्त्रबाट जनताका प्रतिनिधिमा शासन व्यवस्था र स्थानीय सरकारको जिम्मा गएकोले देशको विकासमा योगदान पुग्ने बताए । निर्वाचित संयोजक ढुंगानाले सबै दल, स्थानीय तह र कर्मचारीतन्त्र समेतको सहकार्यमा जिल्लाको विकास निर्माणको काममा लाग्ने प्रतिवद्धता जनाए । संविधानले दिएको अधिकार र कर्तव्य पुरा गर्नका लागि लाग्ने भन्दै प्रदेश र स्थानीय सरकारको पुलको रुपमा काम गर्ने जिम्मेवारी पुरा गर्न प्रतिवद्ध भएको पनि धारणा राखे ।
सपथमा देखिएका दृश्य
शुक्रवार साँझ ५ बजे शुरु भएको समन्वय समितिका पदाधिकारीको सपथ ग्रहण कार्यक्रमको आयोजना प्रमुख निर्वाचन अधिकृतको कार्यालयले गरेको थियो । कार्यक्रममा आसन ग्रहणमै आयोजक निकै अलमलमा परे । केही राजनीतिक दललाई बोलाउनै विर्सेका थिए भने कार्यक्रम संचालक मंच छाडेर १० मिनेट सम्म अन्यत्रै हिडेपछि सबै मुखामुख गरिरहेका थिए ।
सपथ ग्रहणको समयमा पत्रमा लेखिएको इश्वर, देश र जनताको नाममा सपथ खान्छु भन्ने शब्द प्रयोग नगरी संयोजक र सहसंयोजकले ईश्वर शब्द प्रयोग गरेनन् । तर संयोजक ढुंगानाले सदस्यलाई सपथ खुवाउँदा आँफैले ईश्वरको नाउँमा भनेर भन्दै भट्टयाएपछि सबै सदस्यले भने ईश्वरकै नाउँमा सपथ खाएका थिए । निर्वाचनमा सम्मान जनक मत पाएपनि कांग्रेसका प्रतिनिधि गएका थिएनन् । उद्घोषकले भने राजनीतिक दलको प्रतिनिधिको रुपमा कांग्रेसलाई बोलाएपनि कांग्रेसले जितेका नगर र गाउँपालिकाका प्रमुखको नाम भने आसनग्रहणमा बोलाएनन् । कर्मचारी मार्फत १५ बर्ष चलेको जिल्ला समन्वय समितिमा जनप्रतिनिधि आएपनि आलंकारिक पदमा आएकोले कर्मचारीले सामान्य औपचारिकता प्रकट गरेका थिए भने जितेर आएका प्रतिनिधिहरुमा पनि उस्तो रौनकता भने देखिएन ।