बागलुङ, २० साउन-अविरल बर्षापछि आएको पहिरोमा पुरिएर बाग्लुङमा तीन जनाको मृत्यु भएको छ । ४ जना वेपत्ता भएका छन् । आज बिहान खसेको पहिरोले घर बगाउँदा ढोरपाटन नगरपालिका ५ का ५३ बर्षीय प्रकाश कामी, निसीखोला २ का ६५ बर्षीय मनिमान छन्त्याल र निसीखोला १ भुल्दीकी एक बृद्वाको मृत्यु भएको प्रहरीले जनाएको छ । उनको सनाखत हुन बाँकी छ ।
पहिरोमा पुरिएर एकै परिवारका ३ जना बेपत्ता भएका छन् । मनिमान सँगै पहिरोमा पुरिएकी उनकी श्रीमती ६३ बर्षीया नन्दकली, १८ बर्षीया छोरी गीता र २२ बर्षीया बुहारी विन्दु बेपत्ता भएको प्रहरीले जनाएको छ । उनीहरुको खोजी भइरहेको छ । पहिरोले ढोरपाटन र निसीखोलामा करिव १ दर्जन घर बगाएको छ । विस्थापितहरु छिमेकीको घरमा शरण लिएर बसिरहेको निसीखोला गाउँपालिकाका अध्यक्ष तारानाथ पौडेलले बताए । निसीखोला दोस्रो लघु जलविद्युत आयोजनाको कुलो समेत बडीगाड खोलाले बगाउँदा सो क्षेत्रका करिव १ हजार घरधुरीमा विद्युत आपूर्ति समेत अवरुद्ध भएको छ ।
