बेनी-जोमसोम पैदलबाटो चार दिनपछि खुल्यो

म्याग्दी,२१ भदौ – बिहीबार राति परेको भिषण बर्षापछि बेगखोलामा आएको बाढीले मोटरेवल र झोलुङ्गे पुलसमेत बगाएपछि अवरुद्ध भएको बेनी–जोमसोम सडकमा पैदल यात्रा खुलेको छ ।
बर्षा रोकिएपछि ठडो खहरे बेगखोलामा रेडक्रसकर्मीहरु तथा पदयात्रीको सहकार्यमा साँघु बनेपछि चार दिनपछि पैदल मार्ग खुलेको हो । पहिरोले मोटरमाटो क्षतविक्षत भएकोले यातायात संञ्चालन भने अझै केही दिन लाग्ने भएको हो ।
खोलामा पानीको सतह घटेपछि २७ बढी रेडक्रसकर्मीहरु बाँस, काठ र ढुङ्गाहरु राखेर साँघु बनाएका हुन । गेगरसहितको खहरे बेगखोलामा साँघु वनाउन आफुलाई अमेरिकी सेनाको स्पेशल फोर्समा कार्यरत सैनिक बताउने १० जना पर्यटकहरु,  नेदरल्याण्ड, स्वीडेन र इग्ल्याण्डका पर्यटहरुले पनि श्रमदान गरेका थिए । अन्नपूर्ण चक्रिय पदमार्गबाट फर्केको भने पनि अमेरिकी सैनिकहरु मुस्ताङ्गस्थित उच्च शिखर शिक्षालयमा हाईअल्टीच्युट तालिम लिएर फर्केका हुन ।
अमेरिकी सैनिकहरुलाई नेपाली सेनाको रेन्टर बटालिएनका सैनिहरुले गाईड गरेका थिए ।‘दु:खको यस अवस्थामा हामीले थोरै श्रम गर्न पाउँदा खुसी छौं । कम्तीमा पैदल यात्रा सहज हुने छ,’ कार्टरले बताए ।
विहिवार आएको बाढीले पुल बगाएपछि जिल्लाको उत्तरी भेगका ८ गाविस रमुस्ताङ्ग जाने/फर्कने पैदल बाटो बन्द भएको थियो । खोलाले पुल बगाएपछि पैदलमार्ग समेत अवरुद्ध भएपछि तीजमा घर–माईत हिंडेका चेलीवेटी, पर्यटक तथा सवै बटु्वाहरु महभीर–दोसल्ले–औला–बैसरी वा तिप्ल्याङ्ग–बान्दुक–बेग–भगवती–पिप्लेहुँदै गलेश्वरसम्म पाँच–सात घन्टा लामो घुमाउरो बाटो प्रयोग गर्न बाध्य थिए ।
बेगखोलामा आएको बाढीले नेपाल विधुत प्राधिकरणको ३३ केभिए तथा ११ केभिए लाईनका ८ वटा पोल बगाएपछि जिल्लाको राम्चे, हिस्तान, शिख, घार, नारच्याङ्ग, दाना, भुरुङ्ग, दोवा र मुस्ताङ्गमा विधुत आपूर्ति बन्दहुँदा अन्धकार भएका छन ।  बेग गाविस, ६ स्थित वेगखोला वस्तीका ११ घर र बेग १ मा तीन घर बगाएको थियो । पहिरोमा परि एक बेपत्ता भएका छन ।
सदरमुकाम बेनीदेखि ११ किमी उत्तर बेनीजोमसोम सडकको बैसरी–तिप्ल्याङ्ग खण्डमा पर्ने वेगखोला वस्तीको सिरानबाट राती एक बजे बाढी पसेको थियो । बाढीपसेपछि करिव ४० जना बालबालिका, बृद्धबृद्धा, सुत्केरी समेतका स्थानिय वस्तीदेखी पश्चिमपाखोमा भागेर ज्यान बचाएका थिए ।
प्रहरीका अनुसार घरको सामान झिक्ने प्रयासगर्दा पूर्णप्रसाद सिंजाली बेपत्ता भएका हुन । बाढीले बेगखोलामाथी निर्मित झोलुङ्गे पुल, बेनी–जोमसोम सडकको बेलीव्रिज बगाएपछि स्थलमार्ग पुरै बन्द भएको छ । बाढीले ल्याएको गेगर र माटोले कालीगण्डकी नदी थुनिएपछि करिव १५ मिटर गहिरो ताल बनेको छ ।