बिराटनगर र वीरगञ्जलाई महानगर बनाउने सरकारको निर्णय

काठमाडौं, ९ जेठ – सरकारले वीरगञ्ज र बिराटनगरलाई महानगरपालिका बनाँउने निर्णय गरेको छ । प्रधानमन्त्रीको सरकारी निवास बालुवाटारमा सोमबार अबेर बसेको बैठकले तराईमा २ महानगरपालिका सहित २२ स्थानीय तह थप गर्ने निर्णय गरेको छ ।
१२ जिल्लामा २२ स्थानीय तह थप गर्ने निर्णय भएको सरकारका प्रवक्ता एवं संचारमन्त्री सुरेन्द्र कार्कीले जानकारी दिए । उपप्रधान तथा स्थानीय विकासमन्त्री विजयकुमार गच्छेदारको टोलीको सुझाव अनुसार २३ गाँउपालिकालाई नगरपालिकामा स्तरोन्नती गर्ने निर्णय समेत गरेको छ ।
मन्त्रीपरिषदको बैठकले सुनसरीमा २ वटा, सप्तरीमा १, रौतहटमा २, पर्सामा २ वटा थप गर्ने तर केही गाँउ नगरपालिमा गाभिने, धनुषामा १ सर्लाहीमा ३, बारामा १, नवलपरासीमा ३, रुपन्देहीमा ३, कपिलबस्तुमा ३, कैलालीमा १, बाँकेमा १ गरी २२ स्थानीय तह थप गरिएको सरकारका प्रवक्ता कार्कीले जानकारी दिए । झापामा २ गाँउपालिकालाई नगरपालिका बनाइएको छ । यस्तै सिराहामा १, रौतहटमा ११ रुपन्देहीमा २, बाँकेमा २, कैलालीमा १ र महोत्तरीमा ३ नगरपालिका थप गरिएको छ । यसअघि तराईका अरु जिल्लामा दश एघारको संख्यामा नगरपालिका भएपनि रौतहटमा ३ वटा मात्र नगरपालिका रहेका कारण जनसंख्यालाई हेरेर नगरपालिका थप गरिएको मन्त्री कार्कीले जानकारी दिए । संयुक्त राष्ट्रसंघको प्रस्ताव नंबर २२ सय ५० मा सुरक्षा र शान्ति सम्बन्धी विषयमा राष्ट्रिय कार्ययोजनालाई स्वीकृती प्रदान गर्ने निर्णय गरेको छ । पशु चिकित्सा समितिको अध्यक्षमा सीताराम अधिकारीलाई नियुक्त गरेको छ ।
दुग्ध विकास समितिको अध्यक्षमा रघुनाथ गौतमलाई नियुक्त गरेको छ । र भलिवल खेललाई राष्ट्रिय खेलको रुपमा राख्ने निर्णय गरेको छ । यस्तै सरकारले म्यादी प्रहरीको समयावधी समेत थप गर्ने निर्णय गरेको छ । दोश्रो तहको स्थानीय तहको निर्वाचन सम्पन्न नभएसम्मका लागि समयावधी थप गरिएको हो ।