विद्यालयद्वारा तरकारी खेती

बागलुङ, १७ भदौ – जिल्लाको हटियास्थित एक बिद्यालयले ब्यवसायिक तरकारी खेती सुरु गरेको छ । हटियाको डाडाँखेतस्थित गोल्डेन फ्युचर आवसिय माध्यामिक विद्यालयका बिद्यार्थी र शिक्षक तरकारी खेतीतर्फ लागेका हुन् ।
बिद्यार्थीलाई पढाई, खेलकुदका अलावा तरकारी खेतीको बारेमा समेत जानकारी गराउने उदेश्यले ५ रोपनी जग्गामा बिद्यालयले ब्यवसायिक तरकारी खेती गरेको बिद्यालयका प्रिन्सिपल चुडामणी शर्माले बताए ।
बिद्यालयले बार्षिक २४ हजार दिने गरि स्थानियको जग्गा भाडामा लिएको छ । बारीमा यतिबेला बिद्यालयका बिद्यार्थी, शिक्षकले टमाटर, बोडी, भिण्डी, करेला, काक्रा, घिरौला, लौका, साग लगायतका तरकारी बाली लगाएका छन् ।
उत्पादित तरकारी बिक्रीबाटै यसबर्ष बिद्यालयले १५ हजार आम्दानी गर्न सफल भएको छभने करिब २० हजार बराबरको तरकारी बिद्यालयकै होस्टेलमा प्रयोग गरिएको छ । विषादीयुक्त खाद्य पदार्थबाट मानिसमा पर्ने असरबारे सचेत बिद्यालयका शिक्षक र बिद्यार्थीहरु अर्गानिक खेतीका लागि आफै उत्पादनतर्फ अग्रसर बनेका हुन् ।
विद्यार्थीले समुहगत रुपमा फुर्सदको समयमा करेसाबारीमा काम गर्दै आईरहेका छन् । टमाटर र अन्य खेति गर्न सुरुवाती चरणमा ५० हजार खर्च भएपनि यसबर्ष १ लाख बराबरको आम्दानी हुने प्रिन्सिपल शर्माको भनाई छ । यस्ता कार्यले विद्यार्थीलाई उद्यमी बन्न सिकाउने बिद्यालयका शिक्षक दिपक खत्रीले बताए ।
स्कुलमा बिभिन्न तरकारी फलफुल रोप्दा उनीहरुलाई कृषक ल्याएर प्रशिक्षण दिने गरेको खत्रीको भनाई छ । विद्यालय पढ्न गएका आफ्ना छोराछोरीहरुले पढाईका साथै अर्गानिक तरकारी खेती गर्दा आफुहरु खुशी भएको अभिभावकहरु बताउँछन् ।
स्कुलमा सिकेरै आफ्ना छोराछोरीले घरआँगनमा फुलबारी, तरकारी खेती गर्न सघाउने गरेको उनीहरु बताउँछन् ।